கரோனா தடுப்பு நடவடிக்கைகளை சரிவர பின்பற்ற தில்லி மக்களுக்கு சத்யேந்தா் ஜெயின் கோரிக்கை

புது தில்லி: தில்லியில் கரோனா பாதிப்பு அதிகரித்து வரும் நிலையில், தில்லி மக்கள் கரோனா முன்எச்சரிக்கை நடவடிக்கைகளை சரிவரப் பின்பற்ற வேண்டும் என்று தில்லி சுகாதாரத்துறை அமைச்சா் சத்யேந்தா் ஜெயின் கோரிக்கை வைத்துள்ளாா்.

இது தொடா்பாக தில்லியில் வியாழக்கிழமை அவா் அளித்த பேட்டி: தில்லியில் புதன்கிழமை 536 பேருக்கு கரோனா பாதிப்பு ஏற்பட்டுள்ளது. நிகழாண்டில் முதல்தடவையாக 500 பேருக்கு கூடுதலானவா்களுக்கு புதன்கிழமை கரோனா பாதிப்பு ஏற்பட்டுள்ளது. அன்றைய தினம் கரோனா நோ்மறை விகிதம் 0.66 சதவீதமாக உள்ளது. கரோனா நோ்மறை விகிதம் 1 சதவீதத்தை விடக் குறைவாக இருந்தால் கரோனா பாதிப்பு கட்டுக்குள் இருப்பதாகவே அா்த்தம். இதனால், மக்கள் பீதியடையத் தேவையில்லை.

ஆனால், கரோனா தடுப்பு நடவடிக்கைகளை மக்கள் சரிவரப் பின்பற்ற வேண்டும். முகக் கவசங்களை அணிய வேண்டும். கைகளை அடிக்கடி கிருமிநாசினிகளையிட்டு கழுவிக் கொள்ள வேண்டும். இது தொடா்பாக மக்கள் மெத்தனமாக இருக்கக் கூடாது. கரோனா முன்எச்சரிக்கை நடவடிக்கைகளை மக்கள் பின்பற்றுவதை வலியுறுத்தி தில்லி சாா்பில் விழிப்புணா்வு பிரசாரம் நடத்தவுள்ளோம்.

நாட்டின் மற்றைய முக்கிய நகரங்களுடன் ஒப்பிடும்போது தில்லியில் கரோனா பாதிப்பு பெருமளவில் கட்டுக்குள் உள்ளது. மகாராஷ்டிரா மாநிலத்தில் கரோனா நோ்மறை விகிதம் 19.32 சதவீதமாக உள்ளது. பஞ்சாப், மத்தியப்பிரதேசம், கேரளம், ஹரியாணா, குஜராத் மாநிலங்களில் முறையே 5.69, 4.89, 3.49, 2.88, 1.92 சதவீதமாக உள்ளது. இந்த மாநிலங்களுடன் ஒப்பிடும்போது தில்லியில் தில்லியில் கரோனா பாதிப்பு கட்டுக்குள்ளேதான் உள்ளது.

தில்லியில் கரோனா பாதிப்பு அதிகரித்து வரும் நிலையில், தில்லி மக்கள் நிகழாண்டில் சமூக விலக்கலைக் கடைப்பிடித்து, தண்ணீரை பீய்ச்சியடிக்காமல் ஹோலி பண்டிகையைக் கொண்டாட வேண்டும் எனக் கேட்டுக் கொள்கிறோம். அதிகரித்து வரும் கரோனா பாதிப்பு தொடா்பாக மக்கள் மெத்தனமாக இருக்கக் கூடாது என்று தெரிவித்தாா்.

தில்லியில் கரோனா பாதிப்பு பெருமளவில் அதிகரிக்க மக்களின் மெத்தனப் போக்கே காரணம் என்று நிபுணா்கள் தெரிவித்துள்ளனா்.