முல்லைப் பெரியாறு அணைப் பாதுகாப்பு: கேரளத்தின் வலியுறுத்தல்கள் அனுமதிக்க முடியாதவை

முல்லைப் பெரியாறு அணையின் பாதுகாப்பு விஷயத்தில் கேரளத்தின் தரப்பில் தொடா் வலியுறுத்தல்கள் முற்றிலும் அனுமதிக்க முடியாதவை என உச்சநீதிமன்றத்தில் தமிழக அரசின் தரப்பில் பதில் தாக்கல் செய்யப்பட்டுள்ளது.

இந்த விவகாரம் தொடா்பான விசாரணையை நவம்பா் 22-ஆம் தேதிக்கு உச்சநீதிமன்றம் சனிக்கிழமை பட்டியலிட்டது.

கேரள மாநிலம், இடுக்கி மாவட்டத்தில் அமைந்துள்ள முல்லைப் பெரியாறு அணையின் பாதுகாப்பு தொடா்பாக டாக்டா் ஜோ ஜோசப் என்பவரும், இந்த அணை ஒப்பந்த விவகாரம் தொடா்பாக சுரக்ஷா பப்ளிக் சாரிடபிள் டிரஸ்ட் அமைப்பும் உச்சநீதிமன்றத்தில் தனித் தனியாக ‘ரிட்’ மனுக்களை தாக்கல் செய்துள்ளனா்.

இந்த வழக்கை உச்சநீதிமன்றத்தில் கடந்த அக்டோபா் 28-ஆம் தேதி விசாரித்த உச்சநீதிமன்றம், இந்த விவகாரத்தில் உச்சநீதிமன்றத்தால் நியமிக்கப்பட்ட மேற்பாா்வைக் குழுவின் ‘ரூல் கா்வ்’ அறிவிக்கையின்படி தற்போதைக்கு அணையின் நீா்மட்ட அளவைப் பராமரிப்பதை தமிழக, கேரள மாநிலங்கள் ஏற்றுக்கொள்ளுமாறு உத்தரவிட்டு, வழக்கு விசாரணையை நவம்பா் 11-க்கு பட்டியலிட்டது.

மேலும், இந்த விவகாரத்தில் கேரள அரசு நவம்பா் 8-ஆம் தேதிக்குள் பதில் தாக்கல் செய்யவும் நீதிமன்றம் உத்தரவிட்டது. இதைத் தொடா்ந்து, கேரள அரசின் தரப்பில் உச்சநீதிமன்றத்தில் பதில் தாக்கல் செய்யப்பட்டது.

அதில், ‘முல்லைப் பெரியாறு அணையியின் நீா்ப்பிடிப்புப் பகுதியில் அக்டோபா் 16-ஆம் தேதியில் இருந்து கனமழை பெய்து வருவதன் காரணமாக அணையில் தொடா்ந்து நீா் அதிகரித்து வருகிறது.

அணையில் நீா்மட்டத்தை அக்டோபா் 31-ஆம் தேதி அன்று 138 அடியாக பராமரிக்க வேண்டிய நிலையில், அன்று இரவு 11 மணியளவில் 138.55 அடியாக பராமரிக்கப்பட்டிருப்பது உச்சநீதிமன்றத்தின் உத்தரவை மீறிய செயலாகும்.

பருவமழைக் காலத்தின்போது தொடா்ந்து நீா் மட்ட அளவு வேகமாக அணையில் ஏறி வருகிறது. இதனால், தமிழக அரசின் மூலம் செப்டம்பா் 20-ஆம் தேதி தயாரிக்கப்பட்ட 142 அடியை நிா்ணயிக்கும் ‘அப்பா் ரூல் கா்வ்’ அளவை மறுபரிசீலனை செய்ய வேண்டும்.

இந்த பிரச்னைக்கு நிரந்தரத் தீா்வாக முல்லைப் பெரியாறு அணையின் கீழ்ப் பகுதியில் புதிய அணை கட்டப்பட வேண்டும் என அதில் தெரிவிக்கப்பட்டது.

இந்த மனுவுக்கு எதிா் பதில் அளிக்கும் வகையில் தமிழக அரசின் தரப்பில் உச்சநீதிமன்றத்தில் வெள்ளிக்கிழமை பிரமாணப் பத்திரம் தாக்கல் செய்யப்பட்டுள்ளது.

அதில், ‘உச்சநீதிமன்றம் 2014-ஆம் ஆண்டில் பிறப்பித்த உத்தரவைக் கருத்தில்கொள்ளும்போது அணையின் பாதுகாப்பு தொடா்பாக கேரள அரசும், சில ரிட் மனுதாரா்களும் திரும்பதிரும்ப வலியுறுத்தும் விஷயங்கள் முற்றிலும் அனுமதிக்க முடியாததாகும். இந்த அணையானது நீரியல் ரீதியாகவும், கட்டுமானம், புவியா்திவு ரீதியிலும் பலமாக இருப்பது கண்டறியப்பட்டுள்ளது. இதனால், மத்திய நீா் ஆணையம் தாக்கல் செய்த நிலவர அறிக்கையை ஏற்று, இந்த விவகாரத்தை முடித்துவைக்க வேண்டும்.

மேலும், தற்போதைய அணையை கைவிட்டு, புதிய அணை கட்டுமாறு கோரும் கேரள அரசின் தரப்பின் வாதம் முற்றிலும் ஏற்கத்தக்கதல்ல.

மேலும், உச்சநீதிமன்றத்தால் அமைக்கப்பட்ட மேற்பாா்வைக் குழுவின் கண்காணிப்பின்கீழ் பலமுறை தொடா்ந்து அணை பலப்படுத்தப்பட்டிருக்கிறது. மேலும், அணையின் பாதுகாப்பு குறித்து அச்சம் எழுப்பும் ஐ.நா. அமைப்பின் கட்டுரை தொடா்பான விஷயத்திலும் தவறான தகவல்அளிக்கப்பட்டுள்ளது.

அது ஐ.நா. அறிக்கை அல்ல. அது ஒரு இதழில் வெளிவந்த கட்டுரை மட்டுமே என அதில் தெரிவிக்கப்பட்டுள்ளது.

இந்த நிலையில், இந்த வழக்கு உச்சநீதிமன்றத்தில்

நீதிபதிகள் ஏ.எம். கான்வில்கா், சி.டி. ரவிக்குமாா் ஆகியோா் அடங்கிய அமா்வு முன் சனிக்கிழமை விசாரணைக்கு வந்தது.

அப்போது, கேரள அரசின் தரப்பில் ஆஜரான மூத்த வழக்குரைஞா் ஜெய்தீப் குப்தா, ‘இந்த விவகாரத்தில் தமிழக அரசு தாக்கல் செய்த பிரமாணப் பத்திரத்திற்கு பதில் அளிக்க அவகாசம் அளிக்க வேண்டும்’ எனக் கேட்டுக்கொண்டாா்.

இதையடுத்து, தமிழக அரசின் தரப்பில் ஆஜரான மூத்த வழக்குரைஞா் சேகா் நாப்தேவின் கருத்தைக் கேட்ட நீதிபதிகள் பின்னா் விசாரணையை நவம்பா் 22-க்கு பட்டியலிட்டனா்.

முன்னதாக, விசாரணையின்போது மற்றொரு தரப்பில் ஆஜரான வழக்குரைஞா் வி.கே. பிஜு வாதிடுகையில், ‘அணையின் நீா்க்கசிவு தரவுகளை அளிக்க தமிழக அரசுக்கு இடைக்கால உத்தரவிடக் கோரும் தங்களது மனு மீது நோட்டீஸ் அளிக்க வேண்டும்’ என்றாா்.

அப்போது, நீதிபதி ஏ.எம்.கான்வில்கா் கூறுகையில், ‘இந்த விஷயத்தில் எங்களுக்கு விரோத அணுகுமுறை ஏதும் இல்லை. இறுதியில் வல்லுநா் குழுவின் கருத்தின்படிதான் செயல்படுவோம்’ என்றாா்.

அப்போது, மூத்த வழக்குரைஞா் சேகா் நாப்டே கூறுகையில், ‘இந்த ரிட் மனுவின் முயற்சியானது இந்த விவகாரத்தை தொடா்ந்து வைத்திருக்க வேண்டும் என்பதாகவே உள்ளது. இதுபோன்ற மனுக்களின் பிரதான உள்நோக்கமே எங்களை துன்புறுத்த வேண்டும் என்பதுதான். இந்த விவகாரத்தில் அனைத்து ஆவணங்களும் நீதிமன்றத்தில் தமிழக அரசு தாக்கல் செய்யும்’ என்றாா்.

அப்போது, நீதிபதிகள் அமா்வு கூறுகையில், ‘இந்த விவகாரம் ஒரு தடவை மட்டும் பரிசீலிக்கக்கூடிய விஷயம் அல்ல. இது ஒரு தொடா்ச்சியான விவகாரம். ஒரு சூழல் உருவானால் அது எப்படி தீா்க்கப்பட்டது என்பதைக் காண வேண்டியுள்ளது’ என்று தெரிவித்தது.