பாரத் வந்தனா பூங்கா கட்டுமானத்தில் மிக உயா் தரத்தை உறுதிப்படுத்த வேண்டும்: துணைநிலை ஆளுநா் உத்தரவு

தில்லி துணைநிலை ஆளுநா் வி.கே. சக்சேனா, துவாரகாவில் வரவிருக்கும் பாரத் வந்தனா பூங்கா இடத்தை சனிக்கிழமை நேரில் பாா்வையிட்டாா்.

அப்போது, திட்டத்தின் கட்டுமானத்தில் ‘உயா்ந்த தரத்தை’ உறுதி செய்ய அதிகாரிகளுக்கு அவா் உத்தரவிட்டாா்.

இது தொடா்பாக அதிகாரிகள் கூறுகையில், ‘துவாரகா துணை நகரத்தில் இந்தப் பூங்கா 220 ஏக்கா் பரப்பளவில் அமைக்கப்படவுள்ளது. பல்வேறு மாநிலங்களின் முக்கிய நினைவுச் சின்னங்கள், சுற்றுச்சூழல் வன மண்டலம் மற்றும் ஏரிகள் ஆகியவற்றின் பிரதிபலிப்பு இருக்கும் என்பதால், இந்தப் பூங்கா ஒரு முக்கிய சுற்றுலா தலமாக இருக்கும்’ என்றனா்.

தில்லி வளா்ச்சி ஆணையத்தின் (டிடிஏ) தலைவரான துணை நிலை ஆளுநா், இந்த இடத்தில், தான் பாா்வையிட்ட புகைப்படங்களை டிவிட்டா் பக்கத்தில் பதிவிட்டிருந்தாா்.

அதில் ‘துவாரகாவில் உள்ள வரவுள்ள லட்சியமிக்க பாரத் வந்தனா பூங்காவில் பணிகள் மற்றும் முன்னேற்றம் ஆகியவற்றை நேரில் பாா்வையிட்டு ஆய்வு செய்தேன். அழகிய தரத்தை பேணுமாறு வலியுறுத்தினேன். மேலும், இந்தத் திட்டப் பணிகளை அதன் காலக்கெடுவிற்குள் முடிக்க முயற்சி செய்யுமாறு என்பிசிசி மற்றும் டிடிஏ அதிகாரிகளுக்கு அறிவுறுத்தப்பட்டது. அதே போன்று, கட்டுமானத்தின் மிக உயா்ந்த தரத்தை உறுதிப்படுத்துமாறும் உத்தரவிட்டுள்ளேன்’ என்று தெரிவித்துள்ளாா்.

முன்னாள் தில்லி துணைநிலை ஆளுநா் அனில் பய்ஜால் ஆகஸ்ட் 2021-இல் பாரத் வந்தனா பூங்கா திட்டத்திற்காக வகுக்கப்பட்ட காலக்கெடுவை கண்டிப்பாக பின்பற்ற வேண்டும் என்று அதிகாரிகளுக்கு உத்தரவிட்டிருந்தாா். இந்தப் பூங்கா 75-ஆவது சுதந்திர தினத்திற்கு முன் தயாராகிவிடும் என எதிா்பாா்க்கப்படுகிறது.