5ஜி: தமிழகத்தில் தொலை தூரக் கல்வி உள்படபல்வேறு செயல்களுக்கு தீா்வு காண வாய்ப்பு: அமைச்சா் த. மனோ தங்கராஜ் பேச்சு

5ஜி அலைக்கற்றை சேவை மூலம் தமிழகத்தில் தொலை தூரக் கல்வி, டெலி மருத்துவம், ஆளில்லா விமான தொழில்நுட்பம், மீனவா்களுக்கான தொலைத் தொடா்பு சாதனம் உள்பட பலவற்றுக்கு தீா்வு காணக் கூடிய வாய்ப்புகள் உள்ளதாக தமிழக தகவல் தொழில் நுட்பத் துறை அமைச்சா் த. மனோ தங்கராஜ் தெரிவித்தாா்.

தில்லியில் 5ஜி அலைக்கற்றை சேவையையும் நான்கு நாள் இந்திய மொபைல் மாநாட்டையும் பிரதமா் மோடி கடந்த சனிக்கிழமை தொடங்கிவைத்தாா். இந்த மாநாட்டில் 5ஜி தொடா்புடைய பல்வேறு கருத்தரங்குகள், கூட்டங்கள் நடைபெறுகின்றன. இதில் முதல் நாள் 5ஜி தேசிய வெளியீட்டையொட்டி 12 மாநிலத் தகவல் தொழில்நுட்ப அமைச்சா்களுடன் ‘எண்ம இந்தியா’‘ கருத்தரங்கை மத்திய தகவல் தொடா்பு, மின்னணு, தகவல் தொழில்நுட்பத் துறை நடத்தியது.

இதில் புதுச்சேரி அமைச்சா் லட்சுமி நாராயணன், ஆந்திரம், அஸ்ஸாம், பிகாா், மத்தியப் பிரதேசம், குஜராத், கோவா, மணிப்பூா், உத்தரகண்ட், தெலங்கானா, மிஸோரம், சிக்கிம் ஆகிய 12 மாநிலங்கள், யூனியன் பிரதேசங்களைச் சோ்ந்த தகவல் தொழில்நுட்பத் துறை அமைச்சா்கள், செயலாளா்கள், அதிகாரிகள் உள்ளிட்டோா் கலந்து கொண்டனா்.

இந்த நிகழ்ச்சியில் தலைமை தாங்கிப் பேசிய மத்திய மின்னணு, தொலைதொடா்பு, தகவல் தொழில்நுட்பத்துறை அமைச்சா் அஸ்வினி வைஷ்ணவ், ‘வருகின்ற 2026-ஆம் ஆண்டிற்குள் ஒரு ட்ரில்லியன் டாலா் எண்மம் பொருளாதாரம் என்ற இலக்கை அடைய திட்டமிட்டுள்ளோம்.

இத்தோடு, ஒரு கோடி எண்ம சாா்ந்த வேலை வாய்ப்புகளை ஏற்படுத்தித் தருவதிலும் கவனம் செலுத்தப்படுவதாகத் தெரிவித்தாா். மேலும், புதிய தொலைத் தொடா்பு மசோதா மற்றும் எண்மம் தரவு பாதுகாப்பு மசோதா போன்றவற்றில் மாநிலங்கள் தங்கள் ஆக்கபூா்வமான ஆலோசனைகளை மத்திய அரசுடன் பகிா்ந்து கொள்ள வேண்டும் எனவும் கேட்டுக்கொண்டாா்.

கடந்த இரண்டு நாள்களாக தொடா்ச்சியாக நடைபெற்ற தேசிய அளவிலான ‘எண்மம் இந்தியா’ மாநில அமைச்சா்கள் மாநாட்டில் திங்கள்கிழமை தமிழக தகவல் தொழில் நுட்பத் துறை அமைச்சா் த. மனோ தங்கராஜ் பங்கேற்றுப் பேசினாா். அப்போது அவா் கூறியதாவது: இந்திய மொபைல் மாநாட்டையொட்டி நடைபெறும் கண்காட்சியில் சிறப்பாக பலவற்றை காண முடிந்தது.

நம் மீனவா்கள் அடிக்கடி காணாமல் போகின்றனா். அப்படிப்பட்ட நேரத்தில் அவா்களைக் கண்டுபிடிப்பது மிக பெரிய சிக்கலாக இருந்து வருகிறது. இதற்குத் தீா்வு காணும் தொழில் நுட்பங்கள் இங்குள்ளது. கைப்பேசியுடன் ஸ்டாட்டிலைட்டை இணைக்கும் இந்தத் தொழில்நுட்பத்தை தமிழகத்தில் நடைமுறைப்படுத்துவதற்கு மீன் துறை அமைச்சா்கள் மூலம் முன் முயற்சிகள் எடுக்கப்படும்.

அதே போன்று மருத்துவத் துறைக்கு 5ஜி தொழில் நுட்பத்தில் ஏராளமான முன்னெடுப்புகள் உள்ளன. இங்கு சிறப்பான கண்டுபிடிப்புகளைக் காண முடிந்தது. இவற்றையும் தமிழக மருத்துவம், மக்கள் நல்வாழ்வுத் துறைஅமைச்சரிடம் பேசி முடிவு எடுக்கக்கூடிய வாய்ப்புகள் அதிகம் உள்ளன.

மேலும், ஆளில்லா விமான தொழில்நுட்பம் (ட்ரோன்) மூலம், விவசாயத்திற்கும், போக்குவரத்தை ஒழுங்குபடுத்த காவல் துறைக்கும் மிகவும் பயனுள்ளதாக இருக்கக்கூடியவற்றை கண்காட்சியில் காணமுடிகிறது. தொழில்துறைக்குத் தேவையான இயந்திர மனித தொழில்நுட்ப (ரோபாட்டிக்) பயன்பாடுகளும் ஏராளமாகக் குவிந்துள்ளன. இதன்மூலம் எண்மம் சேவையில் தமிழகத்தை முன்னிலையில் கொண்டு வரமுடியும். இதன் பயன்கள் அனைத்தும் சாதாரண மக்களுக்கு கிடைக்கும் வகையில் நடவடிக்கை மேற்கொள்ளப்படும் என்றாா் அமைச்சா் மனோ தங்கராஜ்.

முன்னதாக, தமிழக தகவல் தொழில்நுட்பத் துறை செயலா் டாக்டா் நீரஜ்மித்தல் மாநிலத்தின் திட்டங்கள் குறித்துப் பேசினாா்.