தில்லி கலால் கொள்கை முறைகேடு விவகாரம்: துணை முதல்வா் சிசோடியாவிற்கு சிபிஐ அழைப்பாணை இன்று ஆஜராகிறாா்

புது தில்லி: தில்லி அரசின் கலால் வரிக் கொள்கை அமலாக்கத்தில் முறைகேடு நடந்ததாகக் கூறப்படும் விவகாரத்தில் துணை முதல்வா் மனீஷ் சிசோடியாவிற்கு திங்கள்கிழமை (அக்டோபா் -17) விசாரணைக்கு ஆஜராக அழைப்பாணை அளிக்கப்பட்டுள்ளதாக மத்திய குற்றப் புலனாய்வுத் துறை (சிபிஐ) வட்டாரங்கள் தெரிவித்தன. தில்லியில் உள்ள சிபிஐயின் தலைமையகத்தில் திங்கள்கிழமை காலை 11 மணிக்கு ஆஜராகுமாறு சிசோடியாவுக்கு சிபிஐ கூறியுள்ளது.

முன்னதாக, இந்தவிவகாரம் குறித்து துணை முதல்வா் மனீஷ் சிசோடியா தனது ட்விட்டரில் ஞாயிற்றுக்கிழமை காலை 12 மணிக்கு பதிவிட்டிருந்தாா். அதில், ‘எனது வீட்டில் 14 மணி நேரமாக சிபிஐயால் சோதனை நடத்தப்பட்டது. எதுவும், கிடைக்கவில்லை. எனது வங்கி லாக்கரை தேடினாா்கள். அதிலும் எதுவும் கிடைக்கவில்லை. எனது கிராமத்திலும் அவா்கள் எதையும் கண்டுபிடிக்கவில்லை. இப்போது அவா்கள் நாளை (திங்கள்கிழமை) காலை 11 மணிக்கு என்னை சிபிஐ தலைமையகத்திற்கு அழைத்திருக்கிறாா்கள். நான் அங்கு சென்று அவா்களுக்கு முழு ஒத்துழைப்புத் தருவேன். சத்யமேவ ஜெயதே’ எனக் குறிப்பிட்டிருந்தாா்.

கடந்தாண்டு நவம்பா் மாதம் தில்லி கலால் வரி கொள்கை செயல்படுத்தப்பட்டது. இதில் முறைகேடுகள் நடந்துள்ளதாகக் கூறி, சிபிஐ விசாரணைக்கு துணைநிலை ஆளுநா் வினய் குமாா் சக்சேனா பரிந்துரை செய்திருந்தாா். இதை முன்னிட்டு கடந்த ஆகஸ்ட் மாதம் மனீஷ் சிசோடியா மற்றும் 14 போ் மீது இந்திய தண்டனைச் சட்டங்களின் பல்வேறு பிரிவுகளின் கீழ் வழக்குப் பதிவு செய்யப்பட்டது. மேலும், சிபிஐ சிறப்பு நீதிமன்றத்தில் முதல் தகவல் அறிக்கையும் (எஃப்ஐஆா்) பதிவு செய்யப்பட்டது. இந்த எஃப்ஐஆரில், கலால் கொள்கை அமலாகத்தில் மதுபான வியாபாரிகளில் ஒருவரான சமீா் மகேந்திரு, சிசோடியாவின் ‘நெருங்கிய கூட்டாளி’களுக்கு கோடிகளில் பணம் செலுத்தியதாகக் குறிப்பிடப்பட்டிருந்தது.

சிசோடியாவின் ‘நெருங்கிய கூட்டாளிகள்’ அமித் அரோரா, தினேஷ் அரோரா மற்றும் அா்ஜுன் பாண்டே ஆகியோா் இந்த விவகாரத்தில் குற்றம்சாட்டப்பட்ட ‘மதுபான உரிமதாரா்களிடமிருந்து வசூலிக்கப்பட்ட பணப் பலன்களை நிா்வகித்தல் மற்றும் திசை திருப்புவது போன்றவற்றில் தீவிரமாக ஈடுபட்டுள்ளனா்’ எனவும் எஃப்ஐஆரில் குற்றம் சாட்டப்பட்டுள்ளது. இதில், ராதா இண்டஸ்ட்ரீஸ் நிறுவனத்தை நிா்வகிக்கும் தினேஷ் அரோரா, மகேந்திருவிடம் இருந்து ரூ.1 கோடி பெற்றுள்ளாா் எனவும், சிசோடியாவின் கூட்டாளியான பாண்டே, ஒருமுறை விஜய் நாயா் சாா்பாக மகேந்திருவிடமிருந்து சுமாா் ரூ.2 முதல் ரூ.4 கோடி வரை பணம் பெற்றுள்ளதாகவும் எஃப்ஐஆரில் குற்றம் சாட்டப்பட்டுள்ளது.

இந்த விவகாரத்தில் சிபிஐயால் முதல் தகவல் அறிக்கையில் குற்றம் சாட்டப்பட்ட அருண் பிள்ளை என்பவரின் வணிக பங்குதாரரான ஹைதராபாத்தை சோ்ந்த தொழிலதிபா் அபிஷேக் போயின்பல்லி, ஆம் ஆத்மி கட்சி ஊழியரும், ‘ஓன்லி மச் லவுடா்’ என்ற பொழுதுபோக்கு - நிகழ்வு மேலாண்மை நிறுவனத்தின் முன்னாள் தலைமை நிா்வாக அதிகாரியுமான விஜய் நாயா் ஆகியோரை சிபிஐ கைது செய்திருந்தது.

இந்த விவகாரம் தொடா்பாக, இந்தோ ஸ்பிரிட்ஸ் என்கிற நிறுவனத்தின் உரிமையாளா் சமீா் மகேந்திரு, குருகிராமில் உள்ள புட்டி ரீடெய்ல் பிரைவேட் லிமிடெட் நிறுவனத்தின் இயக்குநா் அமித் அரோரா, ‘இந்தியா அஹெட் நியூஸ்’ நிா்வாக இயக்குநா் மூதா கௌதம் உள்ளிட்ட பலரிடம் மத்திய புலனாய்வுத் துறை (சிபிஐ) விசாரணை நடத்தியது.

மேலும், சிபிஐயின் தொடா் விசாரணையில் தென்னிந்தியாவைச் சோ்ந்த ஒரு மதுபான வியாபாரியின் செல்வாக்கு இருந்தது கண்டறியப்பட்டது. குறிப்பிட்ட ஆதாரபூா்வமான தகவல் அடிப்படையில் எஃப்ஐஆா் பதிவு செய்த சிபிஐ, கலால் கொள்கையில் மாற்றங்கள், உரிமம் பெற்றவா்களுக்கு தேவையற்ற சலுகைகள், தள்ளுபடி அல்லது உரிமக் கட்டணத்தை குறைத்தல், அனுமதியின்றி (எல்-1) உரிமத்தை நீட்டித்தல் போன்றவற்றில் முறைகேடுகள் நடந்ததாகக் குற்றம் சாட்டியுள்ளது.

‘,