தாய்மொழியில் பாடங்களை கற்றுத்தர வேண்டும்: குடியரசுத் தலைவா் வேண்டுகோள்

புது தில்லி: தாய்மொழியில் பாடங்களை ஆசிரியா்கள் கற்று தரும் நிலையிலேயே மாணவா்கள் எளிதாக தங்கள் திறமையை வளா்த்து கொள்ள முடியும் என்று குடியரசுத் தலைவா் திரௌபதி முா்மு கேட்டுக் கொண்டாா்.

ஆசிரியா் தினத்தை (செப்டம்பா் 5) முன்னிட்டு, தில்லி விஞ்ஞான் பவனில் நல்லாசிரியா்களுக்கு தேசிய விருது வழங்கும் நிகழ்ச்சி மத்திய கல்வித் துறை அமைச்சகம் சாா்பில் திங்கள்கிழமை நடைபெற்றது. மத்திய கல்வித் துறை அமைச்சா் தா்மேந்திர பிரதான் தலைமையில் நடைபெற்ற இந்த நிகழ்ச்சியில், குடியரசுத் தலைவா் திரௌபதி முா்மு, 18 பெண் ஆசிரியா்கள் உள்ளிட்ட 45 ஆசிரியா்களுக்கு விருதுகளை வழங்கி சிறப்புரையாற்றினாா்.

அப்போது அவா் கூறியதாவது: நமது கலாசாரத்தில் ஆசிரியா்கள் மரியாதைக்குரியவா்களாக கருதப்படுகிறாா்கள். இதனால்தான் புகழ்பெற்ற தத்தவஞானிகள் நாட்டின் 2-ஆவது குடியரசுத் தலைவா் டாக்டா் ராதாகிருஷ்ணனின் பிறந்த நாளை ‘ஆசிரியா் தினமாக’ கொண்டாட விருப்பம் தெரிவித்தனா். மற்றோரு முன்னாள் குடியரசுத் தலைவா் டாக்டா் அப்துல் கலாமிடம் ஒரு நிகழ்ச்சியில், விஞ்ஞானியாக நினைவுகூரப்படுவீா்களா அல்லது குடியரசுத் தலைவராக நினைவு கூரப்படுவீா்களா எனக் கேட்ட போது, அதற்கு அவா், ‘ஒரு ஆசிரியராக நினைவு கூரப்படவே விரும்புகிறேன்’ என்றாா். மாணவா்களிடம் கேள்விகள் கேட்கும் ஞானத்தையும், சந்தேகங்களை வெளிப்படுத்தும் பழக்கத்தையும் ஆசிரியா்கள் ஊக்குவிக்க வேண்டும். மேலும் கேள்விகளுக்கு பதில் அளிப்பதன் மூலமும் சந்தேகங்களை தீா்ப்பதன் மூலமும் அவா்களின் அறிவுத்திறனும் பெருகும் என்றாா் திரௌபதி முா்மு.

மேலும், டாக்டா் அப்துல்கலாமிற்கும் அவரது ஆசிரியருக்கும் நடந்த சம்பவத்தை விளக்கி, கலாமிற்கு அறிவியலின் மீதான நாட்டம் பள்ளி அறையில் வலுப்பெற்ற சம்பத்தையும் முா்மு குறிப்பிட்டாா். அவா் மேலும் கூறுகையில், ‘ எனது ஆசிரியா்கள் பாடங்களை மட்டும் கற்றுத் தரவில்லை. அன்பையும், உத்வேகத்தையும் வழங்கினா். எனது குடும்பத்தினா், ஆசிரியா்கள் வழிகாட்டுதல் காரணமாகவே, எனது கிராமத்தில் கல்லூரிக்கு சென்ற முதல் பெண் என்ற பெருமை எனக்கு கிடைத்தது. நான் வாழ்க்கையில் எதை சாதித்தாலும், அது எனது ஆசிரியா்களுக்கு கடமைப்பட்டுள்ளதாகவே கருதுகிறேன். இன்றைய நிலையில் அறிவியல், ஆராய்ச்சி, புத்தாக்கம் உள்ளிட்டவை அறிவுசாா் பொருளாதார வளா்ச்சிக்கு அடிப்படை. இந்த துறைகளில் இந்தியாவை மேலும் வலுப்படுத்த பள்ளிக் கல்வி வாயிலாக அடித்தளம் அமைக்கப்பட வேண்டும்’. என்றாா்.

‘அறிவியல், இலக்கியம் அல்லது சமூக அறிவியல் உள்ளிட்ட துறைகளின் உண்மையான வளா்ச்சியை அடைய, தாய்மொழி வழிக் கல்வியே மிகவும் சிறந்தது. பயனளிக்கக் கூடியது மட்டுமல்ல; இயல்பான திறமையை வளா்ப்பதற்கு தாய்மொழியே உதவும். நமது ஆரம்ப கால வாழ்வில் நமக்கு வாழும் கலையை கற்று தருவது நமது தாய்மாா்கள். தாய்க்கு அடுத்த நிலையில், நம் வாழ்வில் கல்வியை கற்றுத் தருவது ஆசிரியா்கள். ஆசிரியா்கள் தாய்மொழியில் பாடம் கற்று தந்தால், மாணவா்கள் எளிதாக திறமையை வளா்த்து கொள்ள முடியும். அதனால்தான் தேசிய கல்விக் கொள்கை 2020-ல், பள்ளிக் கல்வி, உயா்நிலைக் கல்வியில், இந்திய மொழிகளில் பாடம் நடத்த வலியுறுத்தப்பட்டுள்ளது. அறிவியல், ஆராய்ச்சிகளில் மாணவா்களுக்கு ஆா்வத்தை தூண்டுவது ஆசிரியா்களின் பொறுப்பாகும். நம் வாழ்க்கையை உதாரணமாக வைத்து, சிக்கலான கொள்கைகளை எளிதாக விளக்குபவா்களே சிறந்த ஆசிரியா்கள்’ என்றாா் அவா்.

குடியரசுத் தலைவா் மாளிகையில்: முன்னதாக முன்னாள் குடியரசுத் தலைவா் டாக்டா் சா்வபள்ளி ராதாகிருஷ்ணனின் பிறந்தநாளை முன்னிட்டு, குடியரசுத் தலைவா் மாளிகையில், வைக்கப்பட்ட டாக்டா் ராதாகிருஷ்ணனின் உருவப்படத்திற்கு குடியரசுத் தலைவரும், அதிகாரிகளும் மலா் தூவி மரியாதை செலுத்தினா்.