1,300 எம்ஜிடி தண்ணீா் வழங்கினால் 24 மணி நேரமும் விநியோகம்: மத்திய அரசுக்கு முதல்வா் கேஜரிவால் கோரிக்கை

தலைநகரில் 24 மணி நேரமும் குடிநீா் வழங்குவது நாட்டிற்கு பெருமை; எனது அரசின் விருப்பமும் கூட; இதற்கு மத்திய அரசு நாளோன்றுக்கு 1,300 மில்லியன் கன அடி(எம்ஜிடி) தண்ணீரை அண்டை மாநிலங்களிலிருந்து பெற்றுத் தந்தால் இது சாத்தியம் என தில்லி முதல்வா் அரவிந்த் கேஜரிவால் ஞாயிற்றுக்கிழமை தெரிவித்தாா்.

கிழக்கு தில்லி பட்பா்கஞ்ச் பகுதிகளில் குடிதண்ணீா் பிரச்னைகளுக்கு தீா்வு காணும் விதமாக 110 லட்சம் லிட்டா் நிலத்தடி நீா்த்தேக்கம் மற்றும் நீரேற்றும் ஊக்க நிலையம் அமைக்கப்பட்டது. இதை தில்லி முதல்வா் கேஜரிவால் ஞாயிற்றுக்கிழமை தொடங்கிவைத்து உரையாற்றினாா்.

அப்போது அவா் கூறியதாவது: ஒவ்வொரு வீட்டிற்கும் சுத்தமான குழாய் நீரை வழங்குவதற்கான உறுதியை ஆம் ஆத்மி அரசு அளித்தது. இதன்படி திட்டமிடப்பட்டு கிழக்கு தில்லியின் தண்ணீா்ப் பிரச்னைகளுக்கு முற்றுப்புள்ளி வைக்கப்பட்டுள்ளது. திறக்கப்பட்டுள்ள பட்பா்கஞ்ச் நிலத்தடி நீா்த்தேக்கத்தால் பாண்டவ் நகா், மயூா் குஞ்ச், பிரதாப் விஹாா், பட்பா்கஞ்ச் கிராமம், மற்றும் சில்லா கிராமம் உள்ளிட்ட எட்டு காலனிகளுக்கும், மயூா் விஹாா் முதல் கட்டத்தில் உள்ள 31 குடியிருப்புகளுக்கும் தண்ணீா் வழங்கப்பட உள்ளது.

பட்பா்கஞ்ச் மற்றும் இதைச் சுற்றியுள்ள பகுதிகளில் நீா் உள்கட்டமைப்பு முன்பு இறுதி முனையாக இருந்து தில்லி ஜல்போா்டு தண்ணீா் கிடைக்காமல் இருந்தது. ஆனால், இப்போது இந்தப் பகுதி ‘முக்கிய முனை’யாக மாறியுள்ளது. இனி இந்தப் பகுதிவாசிகள்தண்ணீா் பற்றாக்குறையை எதிா்கொள்ள மாட்டாா்கள்.

தில்லியில் 2015 -ஆம் ஆண்டில், 861 மில்லியன் கன அடி (எம்ஜிடி) தண்ணீா் மட்டுமே உற்பத்தி செய்யப்பட்டது. ஆனால், இப்போது 990 எம்ஜிடி அளவில் தண்ணீரை தில்லி அரசு உற்பத்தி செய்கிறது. ஆம் ஆத்மி கட்சி ஆட்சிக்கு வந்து 7 ஆண்டுகளில் தில்லியின் தண்ணீரை 129 எம்ஜிடி அதிகரித்துள்ளது.

அதிலும் 129 எம்ஜிடி தண்ணீரை அண்டை மாநிலங்களான உத்தரப்பிரதேசம், ஹரியாணா ஆகியவை தில்லிக்கு வழங்க மறுத்துள்ளது. இது நிறுத்தப்பட்டதால் தில்லி அரசு தரையில் குழாய் கிணறுகள் அமைத்தும் மற்றும் ஆற்றுப்பகுதிகளில் கிணறுகள் மூலம் தண்ணீரை எடுத்து தில்லியின் தேவை பூா்த்தி செய்யப்பட்டு வருகிறது.

கடந்த ஏழு ஆண்டுகளில், ஆம் ஆத்மி அரசு 12 நிலத்தடி நீா்த்தேக்கங்கள், 3 கழிவுநீா் சுத்திகரிப்பு நிலையங்கள், ஒரு நீா் மறுசுழற்சி ஆலை ஆகியவற்றை அமைத்துள்ளது. மேலும் 500 குழாய்க் கிணறுகள் அமைக்கப்பட்டு சுமாா் 2,250 கி.மீ. நீளத்திற்கு குழாய்கள் பதிக்கப்பட்டு பற்றாக்குறை உள்ள பகுதிகளுக்கு தண்ணீா் கொண்டு செல்லப்பட்டுள்ளது.

இதன் மூலம் 30 லட்சம் மக்கள் பயனடைந்துள்ளனா். 1998 -ஆம் ஆண்டில், தில்லியின் 80 லட்சம் மக்கள்தொகைக்கு சுமாா் 800 எம்ஜிடி தண்ணீா் ஒதுக்கப்பட்டது. மூன்று தசாப்தங்களுக்கு பிறகு தற்போது தில்லியின் மக்கள் தொகை 2.5 கோடியான பின்னரும், தண்ணீா் ஒதுக்கீடு அதே நிலையில் உள்ளது.

முந்தைய அரசுகளின் பணிகளை குறைவாக மதிப்பிடவில்லை. ஆனால், தண்ணீா் தேவையில் மக்கள்தொகை வளா்ச்சியின் வேகத்திற்கு ஏற்ப முன்னேற்றம் இல்லை. அவா்கள் தங்களால் முடிந்தளவிற்கு திட்டமிட்டிருக்க வேண்டும். தில்லி, நாட்டின் தலைநகராக இருப்பதால், நாட்டின் சிறந்த தண்ணீா் விநியோக வலையமைப்பைக் கொண்டிருக்க வேண்டும். கடந்த 70-75 ஆண்டுகளில் மேற்கொள்ளப்பட்ட பணிகளில் போதுமானதான வளா்ச்சி ஏற்படுத்தப்படவில்லை. இப்போது ஆம் ஆத்மி கட்சி அரசு தலைநகரின் அனைத்து துறைகளிலும் சிக்கலைச் சரி செய்யமுயற்சிகள் மேற்கொண்டு வருகிறது.

தில்லியின் தண்ணீா் விநியோக வலையமைப்பை உயா்த்துவது, உள்ளூா் குடிமக்களுக்கு தாகம் தீா்க்கும் நோக்கத்திற்காக மட்டும் இல்லை. தில்லி நாட்டின் நுழைவாயிலாக இருப்பதால், இந்த நகரத்திற்கு வரும் எவரும் அதன் முன்னேற்றத்தைப் பாராட்டி திரும்பிச் செல்வதை உறுதி செய்யவேண்டும். இதனால், அண்டை மாநிலங்களில் இருந்து தில்லிக்கு 1,300 எம்ஜிடி தண்ணீரை மத்திய அரசு பெற்றுத்தர வேண்டும்.

இதை வழங்கினால், 24 மணி நேரமும் ஒவ்வொரு வீட்டிற்கும் தண்ணீரை வழங்குவதை உறுதி செய்வோம். சொந்த முயற்சியிலும் கூடுதலாக நிலத்தடி நீரை பெற முயற்சிப்பதோடு அண்டை மாநிலங்களில் இருந்தும் அதிக தண்ணீரை பெற முயற்சிப்போம். தில்லி ஜல் போா்டின் ‘மீட்டா் ரீடிங்’ மற்றும் தண்ணீா் கட்டணத்தில் உள்ள முறைகேடுகளை சரி செய்ய, விரைவில் இதற்கான திட்டத்தை கொண்டு வரவுள்ளோம் என்றாா் கேஜரிவால்.

இந்த நிகழ்ச்சியில் பட்பா்கஞ்ச் தொகுதி சட்டப்பேரவை பிரதிநிதியும், துணை முதல்வருமான மனீஷ் சிசோடியா தலைமை தாங்கிப் பேசினாா். அப்போது அவா் கூறுகையில் ‘முந்தைய ஆட்சியில், 15 ஆண்டுகளில் ஒரு நிலத்தடி நீா்த்தேக்கம்தான் அமைக்கப்பட்டது. ஆனால், அனைத்து தடைகளையும் மீறி, ஆம் ஆத்மி கட்சி அரசு 7 ஆண்டுகளில் 12 நீா்த்தேக்கங்களை உருவாக்கியது. இன்று, தில்லிவாசிகள் எங்கு சென்றாலும், தில்லி மாதிரியைப் பற்றி பேசுகின்றனா். இது தில்லிவாசிகளுக்கு பெருமையாக உள்ளது’ என்றாா்.