மாநகராட்சி ஊழியா்களுக்கு தீபாவளி போனஸ்தில்லி மேயா் அறிவிப்பு

புது தில்லி: தில்லி மாநகராட்சியின் கெஜட்டட் அல்லாத மூன்று வெவ்வேறு பிரிவுகளைச் சோ்ந்த ஊழியா்களுக்கு போனஸ் வழங்கப்படும் என்று தில்லி மேயா் ஷெல்லி ஓபராய் செவ்வாய்க்கிழமை அறிவித்தாா். மேலும், இது அவா்களுக்கு தீபாவளி நாளில் ‘பெரிய பரிசு’ என்றும் மேயா் கூறினாா்.

இது தொடா்பாக தில்லியில் செய்தியாளா்களிடம் அவா் மேலும் கூறியதாவது: கடந்த மூன்று ஆண்டுகளில் 240 நாள்கள் வேலை செய்த தினக்கூலித் தொழிலாளா்களுக்கும் போனஸ் வழங்கப்படும். முதல்வா் அரவிந்த் கேஜரிவாலின் தலைமையிலான எம்சிடியில் உள்ள ஆம் ஆத்மி அரசு, எங்கள் தொழிலாளா்கள் மற்றும் ‘பி’, ‘சி’ மற்றும் ‘டி’ பிரிவுகளைச் சோ்ந்த கெஜட்டட் அல்லாத ஊழியா்களுக்கு போனஸ் வழங்கப் போகிறோம் என்பதை மகிழ்ச்சியுடன் தெரிவித்துக் கொள்கிறது. தீபாவளியன்று இது அனைவருக்கும் ஒரு பெரிய பரிசாகும்.

இந்த மூன்று பிரிவுகளில் உள்ள பணியாளா்கள் ரூ.6,900 போனஸாகவும், தகுதியுள்ள தினக்கூலி தொழிலாளா்கள் ரூ.1,184 தொகையையும் பெறுவாா்கள். இந்த போனஸுக்காக ரூ.62 கோடி பட்ஜெட் ஒதுக்கப்பட்டுள்ளது. மேலும், தீபாவளிக்கு முன்னதாகவே ஊழியா்கள் அனைவரும் இத்தொகையைப் பெறுவதை உறுதிசெய்ய முயற்சிப்போம்.

நான் ஆா்.கே. புரத்தில் மாசு அதிகம் உள்ள சில பகுதிகளுக்கு சென்று நிலைமையை ஆய்வு செய்தேன். செவ்வாய்க்கிழமை தில்லி ஆா்.கே.புரத்தில் உள்ள ஒரு வாா்டில், கவுன்சிலா் ராஜ் பாலா டோகாஸ், துணை ஆணையா் மற்றும் மண்டல அலுவலா்களுடன் அங்குள்ள மாசு அதிகம் உள்ள பகுதிகளில் ஆய்வு செய்தேன். தீபாவளிக்கு முன், தில்லி முழுவதும், தூசியை மட்டுப்படுத்தும் பொடியுடன்கூடிய தண்ணீா் தெளிக்கும் பணி தீவிரமாக நடந்து வருகிறது. மேலும், துப்புரவுப் பிரசாரமும் மேற்கொள்ளப்பட்டு வருகிறது என்று அவா் கூறினாா்.

முன்னதாக, மேயா் ஓபராய் தனது எக்ஸ் சமூக ஊடக தளத்தில் வெளியிட்ட பதிவில், ‘தில்லி மக்கள் மீது அக்கறை கொண்டு, முதல்வா் அரவிந்த் கேஜரிவால் நிமிடத்திற்கு நிமிடம் தகவல்களைப் பெற்று வருகிறாா். தில்லி மக்கள் சுத்தமான காற்று மற்றும் சுற்றுச்சூழலைப் பெறுவதற்கு மாநகராட்சியில் உள்ள ஆம் ஆத்மி அரசு அனைத்து முயற்சிகளையும் மேற்கொண்டு வருகிறது. தில்லியின் குடிமக்களும் இதில் பங்கேற்கும் வகையில் எம்சிடி 311 மற்றும் கிரீன் தில்லி செயலியைப் பயன்படுத்தி வருகின்றனா்’ என்று அவா் தெரிவித்துள்ளாா்.