மணிமுத்தாறு அருவியில் 4ஆவது நாளாக குளிக்கத் தடை

திருநெல்வேலி மாவட்டம் அம்பாசமுத்திரம் வனச் சரகத்துக்குள்பட்ட மணிமுத்தாறு அருவியில் 4ஆவது நாளாக சனிக்கிழமையும் குளிக்கத் தடை விதிக்கப்பட்டது.

வடகிழக்குப் பருவமழை தொடங்கியதிலிருந்து திருநெல்வேலி மாவட்டத்தின் மேற்குத் தொடா்ச்சி மலைப் பகுதியில் பரவலாக மழை பெய்து வருகிறது. மாஞ்சோலை, காக்காச்சி, நாலுமுக்கு, ஊத்து உள்ளிட்ட பகுதிகளில் தொடரும் மழையால், மணிமுத்தாறு அருவியில் நீா்வரத்து அதிகரித்துள்ளது. இதனால், சுற்றுலாப் பயணிகளின் பாதுகாப்புக் கருதி குளிக்கத் தடை விதிக்கப்பட்டுள்ளது.

இந்நிலையில், 4ஆவது நாளாக சனிக்கிழமையும் நீா்வரத்து சீராகாததால் குளிப்பதற்கான தடை நீடித்தது. ஆனால், அருவியைப் பாா்வையிட அனுமதி அளிக்கப்பட்டது. நீா்வரத்து சீராகும் வரை குளிக்கத் தடை தொடரும் என, வனத்துறை சாா்பில் தெரிவிக்கப்பட்டது.