கத்தோலிக்க தேவாலயங்களில் இன்று விவிலிய ஞாயிறு கொண்டாட்டம்

குமரி மாவட்ட கத்தோலிக்க ஆலயங்களில் ஞாயிற்றுக்கிழமை விவிலிய ஞாயிறு கொண்டாட்டம் நடைபெறுகிறது.

கத்தோலிக்க கிறிஸ்தவர்கள், ஒவ்வொரு ஆண்டும் செப்டம்பர் மாதத்தில் விவிலிய வாரம் கடைப்பிடிக்கின்றனர். இதன் நிறைவு நாள் விவிலிய ஞாயிறு ஆகும். கத்தோலிக்க கிறிஸ்தவர்கள் விவிலியத்தில் கூறப்பட்டுள்ள போதனைகளை தங்கள் வாழ்வாக்கிக் கொள்ளத் தீவிரமாக வலியுறுத்துவதே விவிலிய வாரத்தின் முதன்மை நோக்கமாக உள்ளது. கடந்த வாரம் தொடங்கப்பட்ட விவிலிய வாரக் கொண்டாட்டம், ஞாயிற்றுக்கிழமை நிறைவடைகிறது. இதையொட்டி, குமரி மாவட்டத்தில் கத்தோலிக்க கிறிஸ்தவ ஆலயங்களில் விவிலிய பவனி, விவிலியச் சொற்பொழிவுகள் உள்ளிட்டவை ஞாயிற்றுக்கிழமை நடைபெறுகின்றன.

குலசேகரம் புனித அகுஸ்தீனார் ஆலயத்தில் ஞாயிற்றுக்கிழமை காலையில் விவிலிய பவனிக்குப் பின்னர் திருப்பலி நடைபெறுகிறது. திருப்பலிக்கு பங்குப் பணியாளர் சூசையன் தலைமை வகித்து மறையுரை நிகழ்த்துகிறார். இதில், உதவிப் பங்குப் பணியாளர்கள் ஷெப்ரின், ராஜன் உள்ளிட்டோர் பங்கேற்கின்றனர்.