மார்த்தாண்டம் அருகே வியாபாரி வீட்டில் திருட முயற்சி: 3 பேரிடம் விசாரணை

மார்த்தாண்டம் அருகே வாழைத்தார் வியாபாரி வீட்டில் புகுந்து திருட முயன்ற கேரள மாநில இளைஞர்கள் 3 பேரை அப்பகுதி பொதுமக்கள் பிடித்து போலீஸாரிடம் ஒப்படைத்தனர். போலீஸார் அவர்களிடம் விசாரணை மேற்கொண்டுள்ளனர்.
மார்த்தாண்டம் அருகே பயணம் வள்ளக்கடவு பகுதியைச் சேர்ந்தவர் விஜயன். இவர் மார்த்தாண்டம் சந்தையில் வாழைத்தார் வியாபாரம் செய்து வருகிறார். சனிக்கிழமை மாலையில் வீட்டை பூட்டிவிட்டு குடும்பத்துடன் வெளியே சென்றாராம். இந்நிலையில், இரவு 7 மணிக்கு மேல் 2 மோட்டார் சைக்கிள்களில் வந்த 4 இளைஞர்கள் வீட்டின் முன்பக்கம் மோட்டார் சைக்கிள்களை நிறுத்திவிட்டு, வீட்டின் பின்பக்கம் சென்று வீட்டுக் கதவை உடைத்து உள்ளே சென்றனராம்.
இதைக் கண்ட அப்பகுதியினர் அங்கு திரண்டு வந்ததையடுத்து அவர்கள் தப்பியோட முயன்றனர். இதில் 3 பேரை பொதுமக்கள் பிடித்தனர். ஒருவர் தப்பிவிட்டார். தொடர்ந்து இதுகுறித்து மார்த்தாண்டம் போலீஸாருக்கு தகவல் தெரிவிக்கப்பட்டது.
மார்த்தாண்டம் காவல் நிலைய ஆய்வாளர் செந்தில்குமார் தலைமையிலான போலீஸார் அப்பகுதிக்கு வந்து, பொதுமக்கள் பிடித்து வைத்திருந்த இளைஞர்களை மீட்டு காவல் நிலையம் கொண்டு சென்று விசாரித்தனர். இதில் அவர்கள் கேரள மாநிலம் திருவனந்தபுரம், பாறசாலை மற்றும் பாத்திமாபுரம் பகுதியைச் சேர்ந்தவர்கள் என தெரியவந்தது. அவர்களிடம் போலீஸார் தீவிரமாக விசாரணை மேற்கொண்டுள்ளனர்.