களியக்காவிளையில் வாகனச் சோதனை: தகுதிச் சான்று புதுப்பிக்காமல் இயங்கிய  கல்லூரி பேருந்து, 5 கேரள வேன்கள் பறிமுதல்

மார்த்தாண்டம் வட்டார போக்குவரத்து அலுவலர் தலைமையிலான அதிகாரிகள் புதன்கிழமை களியக்காவிளையில் மேற்கொண்ட வாகன தணிக்கையில்,  2 ஆண்டுகளாக தகுதிச் சான்று புதுப்பிக்காமல் இயக்கப்பட்ட தனியார் கல்லூரி பேருந்து மற்றும் சாலை வரி செலுத்தாமல் இயங்கிய 5 கேரள பதிவெண் கொண்ட வேன்கள் பறிமுதல் செய்யப்பட்டன.
அரசுப் பேருந்துகளுக்கு இணையாகவும்,  பேருந்துகளுக்கு வருவாய் இழப்பு ஏற்படும் வகையிலும் தனியார் மேக்ஸி கேப் வேன்கள் இயக்கப்படுவதாக பொதுமக்களிடமிருந்து வட்டார போக்குவரத்து அலுவலகத்துக்கும்,  மாவட்ட ஆட்சியருக்கும் புகார்கள் வந்துள்ளன. இதைத் தொடர்ந்து ஆட்சியரின் உத்தரவின் பேரில்,  மார்த்தாண்டம் வட்டார போக்குவரத்து அலுவலர் க. பழனிச்சாமி தலைமையில் அதிகாரிகள் களியக்காவிளையில் வாகன தணிக்கை மேற்கொண்டனர். இதில்,  தமிழகத்தில் சாலை வரி செலுத்தாமலும், அனுமதிச்சீட்டு இல்லாமலும் இயக்கப்பட்ட கேரள பதிவெண் கொண்ட 5 மேக்ஸி கேப் வேன்கள் கண்டறியப்பட்டு பறிமுதல் செய்யப்பட்டது. 
தொடர்ந்து மேற்கொண்ட வாகனச் சோதனையில்,  அப்பகுதி வழியாக வந்த தனியார் கல்லூரி பேருந்தை நிறுத்தி சோதனையிட்டனர்.  இப் பேருந்து 2 ஆண்டுகளாக தகுதிச் சான்று புதுப்பிக்காமல் இயக்கப்படுவது கண்டறியப்பட்டு பறிமுதல் செய்யப்பட்டது. பறிமுதல் செய்யப்பட்ட வாகனங்கள் வட்டார போக்குவரத்து அலுவலகத்துக்கு கொண்டு செல்லப்பட்டன. 
பறிமுதல் செய்யப்பட்ட மேக்ஸி கேப் வேன்களுக்கு தலா ரூ.15 ஆயிரம் அபராதம் விதிக்கப்படும் என்றும்,  தொடர்ந்து வாகனச் சோதனை மேற்கொள்ளப்படும் என்றும் வட்டார போக்குவரத்து அலுவலர் தெரிவித்தார்.