மத்திய அரசு நிதி ஒதுக்கியும் சாலைப் பணியில் மெத்தனம்: களியல் பகுதி மக்கள் அதிருப்தி

மத்திய அரசு நிதி ஒதுக்கீடு செய்தும், குமரி மாவட்டத்தில் சாலைப் பணியை நிறைவேற்றுவதில் மெத்தனப் போக்கு நிலவுவதாக மக்கள் கடும் அதிருப்தி தெரிவித்துள்ளனர். 
குமரி மாவட்டத்தில் மாநில நெடுஞ்சாலைகள் கடந்த 2 ஆண்டுகளுக்கு மேலாக பழுதடைந்த நிலையில் உள்ளன.  குறிப்பாக குழித்துறையிலிருந்து அருமனை,  ஆலஞ்சோலை வழியாக  ஆறுகாணி செல்லும் சாலை பெருமளவில் சேதமடைந்த நிலையில் இருந்தது. இச்சாலையில் உத்தரங்கோடு, முழுக்கோடு உள்ளிட்ட இடங்களில் வாகனங்களை இயக்குவதற்கு பெரும் சிரமம் இருந்து வந்தது. 
இதை அறிந்த, மத்திய இணை அமைச்சர் பொன். ராதாகிருஷ்ணன் முயற்சியால், மத்திய சாலை நிதி தொகுப்பிலிருந்து ரூ. 85 லட்சத்தில் இச்சாலையை சீரமைக்கும் வகையில் கடந்த மார்ச் மாதம் அறிவிக்கை வெளியிடப்பட்டது.  ஆனால், சாலைப் பணிகள் இன்னமும் தொடங்கப்படவில்லை. இதனிடையே, கடந்த ஜூன் முதல் ஆகஸ்ட் வரை பெய்த மழையில் இச்சாலை மேலும்  பழுதடைந்தது. இந்நிலையில், மார்த்தாண்டம் மேம்பாலம் பணிக்கான மாற்று வழித்தடமாக இச்சாலை பயன்படுத்தப்பட்டு வாகனப் போக்குவரத்து மிகுந்துள்ளதால் சாலை மேலும் உருக்குலைந்து வருகிறது. 
குறிப்பாக, களியல் முதல் படப்பச்சை வரை விரிவாக்கப் பணிகள் நிறைவுறாமல் பாதியிலேயே முடங்கியுள்ளதால் அச்சாலை வழியாக பயணம் செய்யும்  மக்களும், வாகன ஓட்டிகளும் கடும் அவதியடைந்துள்ளனர். எனவே,  சாலைப் பணியை விரைந்து முடிக்க  அதிகாரிகள் முன் வர வேண்டுமென மக்கள் எதிர்பார்க்கின்றனர்.