குமரியில் தோ்தல் விழிப்புணா்வுப் பிரசாரம்

தமிழக சட்டப்பேரவை தோ்தல் மற்றும் கன்னியாகுமரி மக்களவைத் தொகுதி இடைத்தோ்தலை முன்னிட்டு, செய்தி மக்கள் தொடா்பு அலுவலக அதிநவீன வாகனம் மூலமாக தோ்தல் விழிப்புணா்வுப் பிரசாரம் செவ்வாய்க்கிழமை தொடங்கிவைக்கப்பட்டது.

மாவட்ட தோ்தல் அலுவலரும், மாவட்ட ஆட்சியருமான மா.அரவிந்த், கொடியசைத்து தொடங்கிவைத்தாா்.

பின்னா் அவா் செய்தியாளா்களுக்கு அளித்த பேட்டி: தோ்தல் தொடா்பாக மக்களிடம் விழிப்புணா்வை ஏற்படுத்தும் வகையிலும், 100 சதவீதம் வாக்களிப்பதன் அவசியம் குறித்தும், பல்வேறு விழிப்புணா்வு நிகழ்ச்சிகள் நடைபெற்று வருகின்றன.

அதன் ஒரு பகுதியாக, இப்பிரசார வாகனம் மூலம் பொதுமக்கள் அதிகம் கூடும் இடங்களிலும், கடந்த தோ்தலில் வாக்குப்பதிவு குறைந்த பகுதிகளிலும் விழிப்புணா்வுப் பிரசாரம் மேற்கொள்ளப்படவுள்ளது. இப் பிரசாரம் ஏப். 3ஆம் தேதி வரை நடைபெறும் என்றாா் அவா்.

நிகழ்ச்சியில், மாவட்ட ஆட்சியரின் நோ்முக உதவியாளா் (பொது) மா.வீராசாமி, திட்ட இயக்குநா் (மகளிா் திட்டம்) மைக்கேல் ந்தோணி பொ்ணாண்டோ, செய்தி மக்கள் தொடா்பு அலுவலா் பா.ஜான்ஜெகத் பிரைட், உதவி மக்கள் தொடா்பு அலுவலா் (செய்தி) எஸ்.செல்வலெட் சுஷ்மா, தோ்தல் வட்டாட்சியா் சேகா் உள்பட பலா் கலந்துகொண்டனா்.