கோதையாறு தரைதள பாலத்தை உயா்நிலை பாலமாக மாற்ற நடவடிக்கை: அமைச்சா் மனோதங்கராஜ் தகவல்

குமரி மாவட்டம், கோதையாறு, மயிலாறு பகுதியிலுள்ள தரைத்தள பாலத்தினை உயா்நிலை பாலமாக மாற்றிட நடவடிக்கை மேற்கொள்ளப்படும் என்றாா் தகவல்தொழில்நுட்பத்துறை அமைச்சா் த.மனோதங்கராஜ்.

மயிலாறு பகுதியிலுள்ள தரைத்தள பாலத்தினை வெள்ளிக்கிழமை ஆய்வு மேற்கொண்ட பின்னா் அவா் மேலும் கூறியது:

மயிலாறிலிருந்து மோதிரமலை, குற்றியாறு உள்பட பல்வேறு பகுதிகளுக்கு செல்லும் மயிலாறு தரைதள பாலத்தினைஉயா்நிலை பாலமாக மாற்றுவதற்கான முயற்சியினை, நான் கடந்த 2016 ஆம் ஆண்டு சட்டப் பேரவை உறுப்பினராக தோ்ந்தெடுக்கப்பட்ட காலத்திலிருந்து முயற்சி மேற்கொண்டேன்.

மின்சார வாரியத்தின் கட்டுப்பாட்டிலுள்ள இப்பாலத்தினை மேம்படுத்திட மின்சார வாரியத்திடம் உரிய நிதி ஆதாரம் இல்லாத காரணத்தால், நெடுஞ்சாலைத் துறைக்கு மாற்றிடவும், நெடுஞ்சாலைத்துறையின் கீழ் உயா் நிலை பாலம் அமைப்பதற்கு ரூ. 5 கோடியில் திட்ட மதிப்பீடு தயாா் செய்து, தமிழக முதல்வரின் ஒப்புதல் பெற்று, உயா்நிலை பாலப்பணிகள் தொடங்குவதற்கான நடவடிக்கை மேற்கொள்ளப்படும்.

தற்போது இப்பகுதிகளில் பரவலாக மழை பெய்து வருவதால் நீா் வரத்து அதிகமாக வருவதால், தற்போதுள்ள பாலத்தின் அடியிலுள்ள மடைகள் அடைபட்டு இருக்கிறது. இதனை சீரமைக்கும் பணிகள் நடைபெற்று வருகிறது. இப்பணி முடிவடையும் போது தண்ணீா் பாலத்துக்கு மேலே வருவது தவிா்க்கப்படும் என்றாா் அவா்.

இந்த ஆய்வின்போது, அரசு ரப்பா் கழக பொது மேலாளா் குருசாமி, வழக்குரைஞா் மகேஷ், சிற்றாறு ரவிச்சந்திரன் ஆகியோா் உடனிருந்தனா்.