மாா்த்தாண்டம் மேம்பாலத்தில் பள்ளம்: சீரமைப்பு பணியை தடுத்து நிறுத்திய முன்னாள் மத்திய அமைச்சா்

கன்னியாகுமரி மாவட்டம், மாா்த்தாண்டம் மேம்பாலத்தில் ஏற்பட்ட பள்ளத்தை வியாழக்கிழமை நேரில் பாா்வையிட்டு ஆய்வு செய்த முன்னாள் மத்திய அமைச்சா் பொன். ராதாகிருஷ்ணன், இதில் சதிச் செயல் நடந்துள்ளதாகவும் தடயங்கள் அழிக்கப்பட்டிருப்பதாகவும் கூறி மேம்பாலம் சீரமைப்பு பணியை தடுத்து நிறுத்தினாா்.

பொன். ராதாகிருஷ்ணன் மத்திய அமைச்சராக பதவி வகித்த காலத்தில், மாா்த்தாண்டம் மேம்பாலம் கட்டப்பட்டு, 2018 ஆம் ஆண்டு டிசம்பா் மாதம் திறக்கப்பட்டது.

இந்த நிலையில் கடந்த செவ்வாய்க்கிழமை இப் பாலம் துவங்கும் பம்மம் பகுதியருகே சாலையில் பெரிய பள்ளம் ஏற்பட்டிருந்தது. இதையடுத்து மேம்பாலம் வழி போக்குவரத்து நிறுத்தப்பட்டு, பள்ளம் சீரமைக்கும் பணி மேற்கொள்ளப்பட்டு வருகிறது.

இந்த நிலையில் முன்னாள் மத்திய அமைச்சா் பொன். ராதாகிருஷ்ணன், மாா்த்தாண்டம் மேம்பாலத்தில் பள்ளம் ஏற்பட்ட பகுதியை வியாழக்கிழமை நேரில் பாா்வையிட்டு ஆய்வு செய்தாா். தொடா்ந்து அங்கு நடைபெற்று வந்த சீரமைப்பு பணிகளை அவா் தடுத்து நிறுத்தினாா். இதைத் தொடா்ந்து அவா் செய்தியாளா்களிடம் கூறியதாவது:

இப் பாலம் கட்டுமானப் பணிகள் நடந்தபோதும், 2019 ஆம் ஆண்டு தோ்தல் வேளையிலும் பாலம் குலுங்குகிறது என ஒருதரப்பினா் புரளி கூறிவந்தனா். பாலத்தை தகா்க்க சதி நடப்பதாக அப்போதே நான் குற்றம் சாட்டியிருந்தேன். பாலத்தில் பாதுகாப்பை அதிகப்படுத்தவும் காவல்துறையிடம் கூறியிருந்தேன். மேலும், ஒருதரப்பினா் எப்போது வேண்டுமானாலும் பாலத்தை தகா்க்கலாம் என்ற விவரத்தையும் 2021 தோ்தலின் போது கூறியிருந்தேன்.

பாலம் கட்டி முடிக்கப்பட்டு நான்கு ஆண்டுகள் ஒப்பந்ததாரரின் பராமரிப்பு காலம் முடிவடைந்த பின்னா், பராமரிப்பு பணிகள் தொடா்ந்து செய்யாததால் சாலையில் குண்டும் குழியும் ஏற்பட்டது. அப்போதைய மாவட்ட ஆட்சியரை தொடா்பு கொண்டு பேசியதையடுத்து தற்காலிக பணிகள் மேற்கொள்ளப்பட்டன.

கடந்த இரண்டு ஆண்டுகளாக மேம்பாலம் சீரமைப்பு பணிக்காக, மாநில நெடுஞ்சாலைத் துறைக்கு தேசிய நெடுஞ்சாலைத் துறை ரூ. 14 கோடி வழங்கியுள்ளது. ஆனால் பராமரிப்பு பணிகள் மேற்கொள்ளப்படவில்லை. பாலம் பராமரிப்பு பணிகள் மேற்கொள்ளாததற்கு மாநில அரசே பொறுப்பு.

அரசியல் ஆதாயத்துக்காக காங்கிரஸ் கட்சியினா் திட்டமிட்டு பாலத்தை உடைத்திருக்கிறாா்கள். அதற்கான விடியோ ஆதாரங்கள் உள்ளன. தேசிய நெடுஞ்சாலைத் துறை அதிகாரிகளும் சம்பவ இடத்தை பாா்த்த போது சதிச் செயல் என தெரியவந்ததையடுத்து அவா்களும் புகாா் அளித்துள்ளனா். பாஜக நிா்வாகிகளும் புகாா் தெரிவித்துள்ளனா். காவல்துறை நடவடிக்கை எடுத்து உண்மை குற்றவாளிகளை கைது செய்ய வேண்டும். தடயத்தை அழித்தவா்கள் தண்டிக்கப்பட வேண்டும்.

இப் பிரச்னையில் வழக்குப் பதிவு செய்யக்கூட காவல்துறை தயாராக இல்லை. போலீஸாா் விசாரணை நடத்தி குற்றவாளிகளை கைது செய்யும் வரை சீரமைப்புப் பணிகள் நடத்தக் கூடாது.

இப் பாலத்தில் கனிமவள லாரிகளை அனுமதிக்கக் கூடாது. சாதாரண லாரிகள், பேருந்துகள் உள்ளிட்ட வாகனங்கள் செல்ல வேண்டும் என்றாா் அவா்.

அப்போது குழித்துறை நகர பாஜக தலைவா் சுமன், குழித்துறை நகா்மன்ற உறுப்பினா்கள் ரெத்தினமணி, விஜூ, மினிகுமாரி, மாநில செயற்குழு உறுப்பினா் ஆா்.ஜெயசீலன், மாவட்ட பொதுச் செயலா்கள் பா. ரமேஷ், ஆா்.டி. சுரேஷ், விவசாய அணி மாநில செயலா் ஜெயக்குமாா் உள்ளிட்டோா் உடனிருந்தனா்.