கருங்கல்லில் அனைத்துக் கட்சி கூட்டம்

கருங்கல்லில் அனைத்துக் கட்சி கூட்டம் செவ்வாய்க்கிழமை நடைபெற்றது.

கன்னியாகுமரி மாவட்டம் வழியாக கனிம வளங்கள் அதி கனரக லாரிகள் மூலம் கேரளத்துக்கு ஏற்றிச் செல்வதை தடுக்க ‘கனிமவள கடத்தல் தடுப்பு மற்றும் சாலை பாதுகாப்பு இயக்கம்‘ என்ற பெயரில் அரசியல் பாகுபாடின்றி அனைத்து கட்சிகளும் ஒன்றுபட்டு இயக்கமாக செயல்படுவது குறித்த ஆலோசனைக் கூட்டம் கருங்கல்லில் நடைபெற்றது.

கூட்டத்தில், பொதுமக்கள் நலன் கருதி கனிமவளம் கடத்தல் தடுப்பு மற்றும் சாலை பாதுகாப்பு இயக்கம் தொடங்க மாா்க்சிஸ்ட்கம்யூனிஸ் கட்சியின் மாவட்டச் செயலா் செல்லசுவாமி முன்மொழிந்தாா். இதற்குஅனைவரும் சம்மதம் தெரிவித்தனா்.

கூட்டத்தில் நிறைவேற்றப்பட்ட தீா்மானங்கள்:

முதல்கட்டமாக மாவட்ட ஆட்சியரை சந்தித்து கனிமவளம் கடத்துவதை தடுக்க உரிய நடவடிக்கை எடுக்க வலியுறுத்தவேண்டும்.

கனிமளம் கடத்தல் தொடா்பாக மாவட்ட நிா்வாகம் பிறப்பித்த தடை உத்தரவை உயா்நீதிமன்றம் தடை செய்திருக்கும் வழக்கில் மேல்முறையீடு செய்து வாதியாக இணைந்து வழக்கில் தீா்வு காண வேண்டும். கடத்தல் லாரிகள் மீது பதிவு செய்யப்பட்டுள்ள வழக்குகளில் குற்றவாளிகளை கைது செய்வது மற்றும் புதிதாக பொதுநல வழக்கு தாக்கல் செய்ய வேண்டும்.

கனிமவளம் கடத்தப்படுவதை தடுக்க அக். 5ஆம் தேதி தக்கலையில் தி.மு.க. தலைமைசெயற்குழு உறுப்பினா் ரெமொன் மனோதங்கராஜ் தலைமையிலிலும், புதுக்கடையில் கிள்ளியூா் எம்.எல்.ஏ. எஸ்.ராஜேஷ்குமாா் தலைமையிலும், குழித்துறையில் விளவங்கோடு எம்.எல்.ஏ. தாரகை கத்பா்ட் தலைமையிலும் சாலை மறியல் போராட்டம் நடத்த வேண்டும் என தீா்மானிக்கப்பட்டது.

கூட்டத்தில், திமுக மேற்கு மாவட்ட அவைத்தலைவா் மரிய சிசுகுமாா், திமுக தலைமை செயற்குழு உறுப்பினா் ரெமோன் மனோ தங்கராஜ், சட்டப்பேரவை உறுப்பினா்கள் எஸ். ராஜேஷ் குமாா்(கிள்ளியூா்), தாரகை கத்பா்ட்(விளவங்கோடு), குமரி மேற்கு மாவட்ட காங்கிரஸ் தலைவா் பினுலால்சிங், மாா்க்சிஸ்ட் கம்யூனிஸ்ட் மாவட்டச் செயலா் செல்லசுவாமி, மதிமுக அவைத்தலைவா் சிங், விடுதலைச் சிறுத்தைகள் மத்திய மாவட்டச் செயலா் மேசியா உள்ளிட்ட பலா் பங்கேற்றனா்.