அமைச்சா் ரகுபதியை பதவிநீக்கம் செய்ய வேண்டும்: பொன். ராதாகிருஷ்ணன்

இந்துகள் குறித்து அவதூறாகப் பேசிய அமைச்சா் ரகுபதியை பதவிநீக்கம் செய்ய வேண்டும் என்றாா் முன்னாள் மத்திய அமைச்சா் பொன்.ராதாகிருஷ்ணன்.

இதுதொடா்பாக, அவா் நாகா்கோவிலில் செய்தியாளா்களுக்கு வெள்ளிக்கிழமை அளித்த பேட்டி:

திருப்பரங்குன்றம் முழு மலையையும் ஒரு சிவலிங்கமாக பக்தா்கள் வழிபட்டதாக ஆங்கிலேயா் ஆட்சிக் காலத்தில் குறிப்பிட்டுள்ளனா். மலை உச்சியில் தீபம் ஏற்ற வேண்டும் என இந்து அமைப்பினா் நீண்ட காலமாக போராடி வருகின்றனா்.

அமைச்சா் ரகுபதி இந்து மதம் என்பது பாரதிய ஜனதா கட்சி என்று கூறியிருக்கிறாா். ஆன்மிகப் பெரியோா்களை கொச்சைப்படுத்துவதாக அமைச்சரின் கருத்து உள்ளது. திமுக மத ரீதியான பிரச்னையை ஏற்படுத்தி அதன்மூலம் சிறுபான்மையினரின் வாக்குகளை திரட்ட முயற்சிக்கிறது.

திருப்பரங்குன்றம் மலையில் தீபம் ஏற்றலாம் என 2005-இல் உடன்பாடு உள்ளது. மலை உச்சியில் தீபம் ஏற்றுவதில் எந்த பிரச்னையும் இல்லை என்று இஸ்லாமியா்கள் நினைக்கும்போது அதை செயல்படுத்தும் வகையில் திமுக அரசு இருந்திருக்க வேண்டும். ஆனால், திமுக மக்களை பிரித்தாளும் வகையில் ஆட்சி நடத்துகிறது.

உடனடியாக அமைச்சா் ரகுபதியை அமைச்சரவையில் இருந்து நீக்க வேண்டும். 2026 பேரவைத் தோ்தலை தமிழக மக்கள் நல்வாய்ப்பாக பயன்படுத்திக் கொள்ள வேண்டும். தயவுசெய்து திமுக தங்களுக்கு ஆதரவாக இருக்கிறது என்று சிறுபான்மையின மக்கள் நினைத்தால் அது தவறு. தில்லியில் பேட்டியளித்த கனிமொழி எம்.பி. மலை மீதுள்ள அந்த தீப தூண் சா்வே கல் என்று கூறியிருக்கிறாா். திருப்பரங்குன்றம் விவகாரத்தில் இஸ்லாமியா்கள் யாரும் எதிா்ப்பு தெரிவிக்கவில்லை.

நீதிபதி சுவாமிநாதனை தகுதி நீக்கம் செய்ய வேண்டும் என்று திருமாவளவன் கூறியிருக்கிறாா்; இதைக் கூற அவருக்கு என்ன உரிமை இருக்கிறது. தமிழகத்தில் திறமையான அரசு இல்லாததால் சட்டம்-ஒழுங்கு சீா்கெட்டுள்ளது என்றாா் அவா்.

பேட்டியின்போது, கன்னியாகுமரி கிழக்கு மாவட்ட பாஜக தலைவா் கோபகுமாா், பொருளாளா் பி. முத்துராமன், தேசிய பொதுக்குழு உறுப்பினா் உமாரதி, மாநிலச் செயலாளா் மீனாதேவ், மாவட்ட பொதுச் செயலாளா் சத்தியஸ்ரீ, மாவட்டச் செயலாளா் ராஜன், அஜித்குமாா், மண்டல தலைவா் சதீஷ், சுனில், சிவசுதன், ஊடகப் பிரிவு மாவட்டத் தலைவா் சந்திரசேகா் உள்பட ஏராளமானோா் உடனிருந்தனா்.