தக்கலை அருகே பைக் விபத்து: முதியவா் உயிரிழப்பு

தக்கலை அருகே பைக் கவிழ்ந்ததில் முதியவா் உயிரிழந்தாா். 2 போ் காயமடைந்தனா்.

மூலச்சல் பன்றி வெட்டான்பாறை பகுதியைச் சோ்ந்தவா் சுதாமணி ( 55). இவா், தனது பேரன் அபின்ராஜ் (19) என்பவருடன் செவ்வாய்க்கிழமை இரவு திருமண விழாவுக்கு மூலச்சல் வழியாக நடந்து சென்று கொண்டிருந்தனா்.

அப்போது, மூலச்சல் புறத்தாள்விளையைச் சோ்ந்த தங்கராஜ் (72) என்பவா் ஓட்டி வந்த பைக் நிலைதடுமாறி அவா்கள் மீது மோதியதாம். இதில் மூவரும் பலத்த காயம் அடைந்தனா். அக்கம் பக்கத்தினா் அவா்களை மீட்டு தக்கலை அரசு மருத்துவமனையில் சிகிச்சைக்காக சோ்த்தனா். அங்கு தங்கராஜ் உயிரிழந்தாா்.

மற்ற இருவரும் மேல் சிகிச்சைக்காக தனியாா் மருத்துவமனையில் சோ்க்கப்பட்டனா். இதுகுறித்து, தக்கலை போலீஸாா் விசாரித்து வருகிறாா்கள்.