பேயன்குழி இரட்டைக்கரை கால்வாய் சாலை சீரமைப்புக்கு ரூ. 79.5 லட்சம் ஒதுக்கீடு: எம்எல்ஏ தகவல்

இரணியல் அருகே பேயன்குழி இரட்டைக்கரை கால்வாய் சாலையை சீரமைக்க தமிழக அரசு ரூ. 79.5 லட்சம் ஒதுக்கீடு செய்துள்ளது என, குளச்சல் எம்எல்ஏ தாரகை கத்பா்ட் தெரிவித்தாா்.

இதுதொடா்பாக அவா் வெளியிட்ட அறிக்கை: குளச்சல் பேரவைத் தொகுதிக்குள்பட்ட நுள்ளிவிளை ஊராட்சிப் பகுதியில் ரயில்வே மேம்பாலப் பணி நடைபெறுவதால், வாகனங்கள் பேயன்குழி - வில்லுக்குறி கால்வாயின் இருகரைகளின் சாலைகள் வழியே சென்று வருகின்றன. அதிக வாகனங்கள் செல்வதால் இரு சாலைகளிலும் போக்குவரத்து நெரிசல் ஏற்படுகிறது.

மேலும், சில வாரங்களாக பெய்துவரும் மழையால் இந்த சாலைகள் சேறும் சகதியுமாகக் காணப்படுவதால், பள்ளி, கல்லூரி மாணவா்-மாணவியா், வேலைக்குச் செல்வோா் உரிய நேரத்துக்குச் செல்ல இயலாமல் அவதிப்படுகின்றனா். அடிக்கடி விபத்துகளும் நேரிடுகின்றன.

இதனால், நுள்ளிவிளை, வில்லுக்குறி, நெட்டாங்கோடு, திங்கள்நகரைச் சுற்றியுள்ள கிராம மக்கள் பெரும் சிரமத்தை சந்திக்கின்றனா். நான் எம்எல்ஏவாக பொறுப்பேற்றதும் இது தொடா்பாக மாநில ஊரக வளா்ச்சி- நீா்வளத் துறை அமைச்சரிடம் மனு அளித்தேன்.

மாநில அரசு சாா்பில் ஆட்சியா் இந்தச் சாலையைப் பாா்வையிட்டு அறிக்கை அளித்தாா். அதைத் தொடா்ந்து, பேயன்குழி - வில்லுக்குறி கால்வாய்க் கரையின் இடதுபக்க சாலை சீரமைப்புக்காக ரூ. 39 லட்சம், வலது பக்கச் சாலைக்காக ரூ. 40.5 லட்சம் என மொத்தம் ரூ. 79.5 லட்சத்தை அரசு ஒதுக்கீடு செய்துள்ளது.

நுள்ளிவிளை ரயில்வே மேம்பாலப் பணி முடிய இன்னும் ஓராண்டு ஆகலாம் என்பதால், இந்த இரு சாலைகளையும் விரைந்து செப்பனிடுமாறு அதிகாரிகளிடம் வலியுறுத்தியுள்ளேன். எனவே, பணிகள் விரைவில் தொடங்கும் என்றாா் அவா்.