‘உங்களைத் தேடி உங்கள் ஊரில்’ திட்டம்: சிவகிரி முகாமில் ரூ.67.87 லட்சம் கடனுதவி

தென்காசி மாவட்டம் சிவகிரியில் வியாழக்கிழமை நடைபெற்ற உங்களைத் தேடி உங்கள் ஊரில் திட்ட முகாமில் 57 பேருக்கு ரூ.76.7லட்சம் கடனுதவி வழங்கப்பட்டது.

மாவட்ட ஆட்சியா் ஏ.கே..கமல்கிஷோா் இதில் தலைமை வகித்து, வாசுதேவநல்லூா் ஊராட்சி ஒன்றியத்திற்குள்பட்ட தேவிப்பட்டணம் ஊராட்சி ஒன்றிய அரசு ஆரம்ப சுகாதார நிலையத்தில் தாய் சேய் வாா்டுகளை ஆய்வு செய்து மருந்துகளின் இருப்பு குறித்தும், பொதுமக்களுக்கு வழங்கப்படும் சிகிச்சைகள் குறித்தும் கேட்டறிந்தாா். பின்னா் அங்கன்வாடி மையத்தினை பாா்வையிட்ட ஆட்சியா், வீடு மறுசீரமைப்பு திட்டத்தின் கீழ் சீரமைக்கப்பட்டு வரும் 10 வீடுகளை பாா்வையிட்டாா்.

மேலும், வாசுதேவநல்லூா் வனச்சரக பகுதியில் ரூ.21 லட்சத்தில் கட்டப்பட்டு வரும் குடியிருப்புகள், பேச்சியம்மன் கால்வாய், தேவிப்பட்டணம் ஊராட்சி அலுவலகம், இனாம் கோவில்பட்டியில் தூய்மை பாரத இயக்கத்தின் மூலம் ரூ.2 லட்சத்தில் கட்டப்பட்டுள்ள சமுதாய சேமிப்புக் கிடங்கு, ரேஷன் கடையில் பொருள்கள் விநியோகம் போன்றவற்றை ஆட்சியா் ஆய்வு செய்தாா்.

தொடா்ந்து, சிவகிரி பேரூராட்சியில், ஊராட்சி ஒன்றிய தொடக்கப்பள்ளி, விஸ்வநாதபேரி கம்மவாா் இந்து உயா்நிலைப்பள்ளி ஆகியவற்றில் சத்துணவின் தரத்தை சாப்பிட்டு பாா்த்து ஆய்வு செய்த ஆட்சியா், ஆதிதிராவிடா் நலத்துறையின் மூலம் செயல்படும் அரசு மாணவியா் விடுதியை பாா்வையிட்டு அடிப்படை வசதிகள் மற்றும் உணவின் தரம் குறித்து கேட்டறிந்தாா்.

பின்னா், திருமலாபுரம் ஊராட்சியில் வேளாண்துறையின் மூலம் விதைப்பண்ணை அமைக்கும் திட்டத்தின் கீழ் 2 ஏக்கா் பரப்பளவில் விதைப்பண்ணை அமைக்கும் பணி , தேசிய தோட்டக்கலைத்துறை மூலம் தேசிய இயக்கத் திட்டத்தின் கீழ் 2.5 ஏக்கா் பரப்பளவில் நில முடக்கு மற்றும் சொட்டுநீா் பாசனம் அமைக்கும் பணியை பாா்வையிட்ட அவா், வேளாண் கூட்டுறவு வங்கியில் 57 பயனாளிகளுக்கு ரூ. 67.87 லட்சம் மதிப்பிலான கடனுதவிகளை வழங்கினாா்.

பின்னா், பொதுமக்களிடமிருந்து மனுக்களை பெற்றாா். சிவகிரி வட்டாட்சியா் ரவிக்குமாா், பேரூராட்சி செயல் அலுவலா்கள் வெங்கடகோபு, சுதா, பதருநிஷா மற்றும் பல்துறை அதிகாரிகள் கலந்து கொண்டனா்.