குற்றாலம் அருகே புகையிலை வைத்திருந்ததாக இருவா் கைது

குற்றாலம் அருகே மத்தளம்பாறையில் விற்பனைக்காக புகையிலைப் பொருள்களை வைத்திருந்தது தொடா்பாக இருவா் கைதுசெய்யப்பட்டனா்.

அவா்களிடமிருந்து பணம் மற்றும் புகையிலைப் பொருள்கள் பறிமுதல் செய்யப்பட்டது.

மத்தளம்பாறை பூமாரியம்மன் கோயில் தெருவைச் சோ்ந்தவா் பா. வசந்தகுமாா்(40). இவா், மத்தளம்பாறை பேருந்துநிறுத்தம் பகுதியில் பழக்கடை நடத்தி வருகிறாா்.

இவருடைய கடைக்கு புகையிலைப் பொருள்கள் கொண்டு வரப்படுவதாக குற்றாலம் தனிப்படையினருக்கு தகவல் கிடைத்தது.

தனிப்படை காவல் உதவி ஆய்வாளா் கருப்பசாமிபாண்டியன் தலைமையிலான போலீஸாா் சோதனை மேற்கொண்ட போது, ஆலங்குளம் குருவன்கோட்டை எமதா்மராஜன் கோயில் தெருவைச் சோ்ந்த லெ. காா்த்திகேயன்(25) என்பவா் 2 மூட்டைகளில் புகையிலைப் பொருள்களை கொண்டு வந்தது தெரியவந்தது.

இதையடுத்து, வசந்தகுமாா் மற்றும் காா்த்திகேயன் கைது செய்யப்பட்டு அவா்களிடமிருந்து ரூ. 30ஆயிரம் மதிப்புள்ள 25 கிலோ புகையிலைப் பொருள்கள், ரூ. 32, 650 பறிமுதல் செய்யப்பட்டது.