"முத்திரை இல்லாத மின்னணு தராசுகளை பயன்படுத்தினால் கடும் நடவடிக்கை'

முத்திரை இடப்படாத மின்னணு தராசுகள் மூலம் வியாபாரம் செய்பவர்கள் மீது கடுமையான நடவடிக்கை எடுக்கப்படும் என மாவட்ட ஆட்சியர் ஷில்பா பிரபாகர் சதீஷ் எச்சரித்துள்ளார். 
இது தொடர்பாக அவர் வெளியிட்ட செய்திக்குறிப்பு: தொழில் செய்யும் சிறு வியாபாரிகள் தமிழ்நாடு அரசின் மூலமாக முத்திரையிடப்பட்ட மின்னணு தராசுகளை மட்டுமே பயன்படுத்த வேண்டும். வியாபார நோக்கத்திற்காக முறையற்ற முத்திரையிடப்படாத தராசுகள் பயன்படுத்துவோரை கண்டறிய தொழிலாளர் நலத்துறை மாவட்ட முழுவதும் தீவிரமாக கண்காணித்து வருகிறது.
கீழப்பாவூர், சிவகாமிபுரம்,  தென்காசி பூ மார்க்கெட் பகுதிகளில் ஆய்வின்போது முத்திரையிடப்படாத 5 மின்னணு தராசுகள் பறிமுதல் செய்யப்பட்டுள்ளன. மேலும், வணிகர்களுக்கு  ரூ.5 ஆயிரம் அபராதம் விதிக்கப்பட்டுள்ளது. தொடர்ந்து இதுபோன்று முறையற்ற தராசுகளை உபயோகிப்போர் மீது நீதிமன்றத்தில் வழக்கு தொடர்ந்து, கடுமையான நடவடிக்கை எடுக்கப்படும் என செய்திக்குறிப்பில் தெரிவிக்கப்பட்டுள்ளது.