பேட்டையில் குடிநீர் இணைப்புகள் துண்டிப்பு

திருநெல்வேலி பேட்டையில் சட்ட விரோதமாக மின்மோட்டார் பொருத்தி தண்ணீரை உறிஞ்சியதாக 2 வீடுகளில் குடிநீர் இணைப்புகள் திங்கள்கிழமை துண்டிக்கப்பட்டன.
திருநெல்வேலி மாநகராட்சி அதிகாரிகளுக்கு வந்த புகார்களின் அடிப்படையில், வார்டு வாரியாக குடிநீர் இணைப்புகளை அதிகாரிகள் ஆய்வு செய்து, மின்மோட்டார்கள் பொருத்தி தண்ணீர்உறிஞ்சப்படுவது குறித்து நடவடிக்கை எடுத்து வருகின்றனர்.
இதையொட்டி, திருநெல்வேலி மண்டலம் பேட்டையில் வார்டு 49 எம்.ஜி.பி. தெரு பகுதியில் உதவி செயற்பொறியாளர் டி. சாமுவேல் செல்வராஜ் தலைமையில் அதிகாரிகள் மேற்கொண்ட ஆய்வின்போது 2 வீடுகளில் மின்மோட்டார் பொருத்தி தண்ணீர் எடுத்து வருவது கண்டறியப்பட்டது. இதையடுத்து, அந்த வீடுகளில் இருந்து மின் மோட்டார்கள் பறிமுதல் செய்யப்பட்டு, குடிநீர் இணைப்புகளும் துண்டிக்கப்பட்டன.