பயிர்க் காப்பீட்டுத் திட்டத்தில் சேர விவசாயிகளுக்கு அழைப்பு

திருநெல்வேலி மாவட்டத்தில் பிரதம மந்திரியின் பயிர்க் காப்பீட்டுத் திட்டத்தில் விவசாயிகள் சேர்ந்து பயன்பெற அழைப்பு விடுக்கப்பட்டுள்ளது.
இதுகுறித்து ஆட்சியர் ஷில்பா பிரபாகர் சதீஷ் வெளியிட்ட செய்திக் குறிப்பு: பிரதம மந்திரியின் பயிர்க் காப்பீட்டுத் திட்டம் திருநெல்வேலி மாவட்டத்தில் மத்திய, மாநில அரசு மானியத்துடன் நிகழாண்டு கார் பருவத்தில் செயல்படுத்தப்படுகிறது. இயற்கை இடர்பாடுகளால் இழப்பு ஏற்படும் விவசாயிகளுக்கு நிதியுதவி வழங்குதல், விவசாயிகளின் உற்பத்தி இழப்பு ஏற்படும் அபாயத்திலிருந்து பாதுகாப்பது உள்ளிட்டவை இத்திட்டத்தின் நோக்கம்.
அறிவிக்க செய்த வருவாய் தொகுப்பு கிராமங்களில் அறிவிப்பு செய்துள்ள வாழை, வெங்காயம், மரவள்ளி பயிர்களை பயிரிடும் விவசாயிகள் (குத்தகை விவசாயிகள் உள்பட) இத்திட்டத்தில் சேர தகுதியானவர்கள். பயிர்க்கடன், விவசாய நகைக்கடன் பெறும் விவசாயிகள்இத்திட்டத்தில் கட்டாயம் சேர்த்துக் கொள்ளப்படுவர். பயிர்க் கடன் பெறாத விவசாயிகள் விருப்பத்தின்பேரில் சேரலாம். இப்பருவத்தில் வெங்காயம், வாழை, மரவள்ளி பயிர்களுக்கு காப்பீட்டுக் கட்டணம் செலுத்துவதற்கான விவசாயிகளின் சேர்க்கை காலக்கெடு தேதி அக். 1வரை நீட்டிக்கப்பட்டுள்ளது. கடன்பெறும், பெறாத விவசாயிகளுக்கு ஒரேவித பயிர்க் காப்பீட்டுத் தொகை, பிரீமியத் தொகை நிர்ணயிக்கப்பட்டுள்ளது. ஏக்கருக்கு வாழைக்கு பிரீமியம் தொகை ரூ. 1,154-ம், வெங்காயத்துக்கு ரூ. 900-ம்,  மரவள்ளிக்கு ரூ. 300-ம் செலுத்த வேண்டும்.
இயற்கை இடர்பாடுகளால் இழப்பு ஏற்படும்போது, காப்பீட்டுக் கட்டணம் செலுத்திய விவசாயிகள் கட்டணமில்லாத 1800 2005 5522 என்ற தொலைபேசி எண்ணில், இழப்பு நிகழ்ந்த 48 மணி நேரத்துக்குள் தெரிவிக்க வேண்டும். மகசூல் இழப்புக்கு வருவாய் கிராமங்களில் மேற்கொள்ளப்படும் பயிர் அறுவடை பரிசோதனை அடிப்படையில் இழப்பீட்டுத் தொகை வழங்கப்படும் என்றார் அவர்.