தியாகராஜநகரில் விநாயகர் தேரோட்டம்

பாளையங்கோட்டை தியாகராஜநகரில் உள்ள அருள்மிகு விக்ன விநாயகர் கோயிலில் விநாயகர் சதுர்த்தி விழாவையொட்டி புதன்கிழமை தேரோட்டம்  நடைபெற்றது.
இத்திருக்  கோயிலில் 30 ஆவது ஆண்டு சதுர்த்தி விழா மற்றும் 26 ஆவது தேர்த்திருவிழா ஆகியவை கடந்த 4 ஆம் தேதி தொடங்கியது. தொடர்ந்து திருவிழா நாள்களில் தினமும் காலை 8 மணிக்கு சிறப்பு அபிஷேகங்கள், தீபாராதனை, மாலை 6.30 மணிக்கு அலங்கார தீபாராதனை, ஆன்மிக சொற்பொழிவு, திருமுறை, தேவார இன்னிசை நிகழ்ச்சிகள் நடைபெற்று வருகின்றன.
புதன்கிழமை காலையில் சிறப்பு தீபாராதனையும், வழிபாடுகளும் நடைபெற்றன. மாலையில் மலர் அலங்காரத்தில் விநாயகர் தேருக்கு எழுந்தருளினார். தியாகராஜநகர் 7 மற்றும் 8 ஆவது வடக்கு தெருக்களில் தேர் வலம் வந்தது. அப்போது, திருமுறை பாடியபடி பக்தர்கள் உடன் சென்றனர். வியாழக்கிழமை (செப். 13) விநாயகர் சதுர்த்தி தினத்தன்று காலை 8 மணிக்கு கும்பபூஜை, பூர்ணாஹுதி, சிறப்பு அபிஷேகங்கள், அலங்கார தீபாராதனை நடக்கிறது.  பகல் 12 மணிக்கு அன்னதானம் வழங்கப்படும்.  ஏற்பாடுகளை கோயில் நிர்வாகிகள் செய்து வருகின்றனர்.