நெல்லையில் குண்டா் சட்டத்தில் இருவா் கைது

திருநெல்வேலி மாநகா், மாவட்ட பகுதிகளில் போக்சோ மற்றும் போதைப் பொருள் விற்பனை உள்ளிட்ட வழக்குகளில் தொடா்புடைய இருவரை போலீஸாா் குண்டா் தடுப்புச்சட்டத்தில் வியாழக்கிழமை கைது செய்தனா்.

பாளையங்கோட்டை பகுதியில் பல்வேறு வழக்குகளில் தொடா்புடைய திருநெல்வேலி சந்திப்பு தெற்கு விளாகம் அய்யாதுரை மகன் மாரிமுத்து (25). இவா் கஞ்சா உள்ளிட்ட போதை பொருள்கள் விற்பனை செய்தது தொடா்பான வழக்கில் கைது செய்யப்பட்டாா். மேலும், இவா் பொது சுகாதார பராமரிப்பிற்கு குந்தகம் விளைவிக்கும் செயல்களில் ஈடுபட்டு வந்தால் இவரை குண்டா் தடுப்பு காவல் சட்டத்தின் கீழ் நடவடிக்கை எடுக்க, மாநகரகாவல் துணை ஆணையா்(கிழக்கு) டி.பி.சுரேஷ்குமாா், பாளையங்கோட்டை சரக காவல் உதவி ஆணையா் பாலச்சந்திரன், பாளையங்கோட்டை காவல் ஆய்வாளா் திருப்பதி ஆகியோா் பரிந்துரை செய்தனா். அதன்பேரில், மாரிமுத்துவை குண்டா் தடுப்புச் சட்டத்தில் கைது செய்ய மாநகர காவல் ஆணையா் ஏ.டி.துரைக்குமாா் உத்தரவிட்டாா். அதன்படி, மாரிமுத்துவை குண்டா் தடுப்புச் சட்டத்தில் கைது செய்தனா்.

பாப்பாக்குடி அருகே உள்ள ரெங்கசமுத்திரம் பண்டாரம் மகன் மாயாண்டி (54). இவா் போக்சோ வழக்கில் கைது செய்யப்பட்டுள்ளாா். இந்நிலையில், இவா் மீது குண்டா் தடுப்புச் சட்டத்தின்கீழ் நடவடிக்கை எடுக்க மாவட்ட காவல் கண்காணிப்பாளா் ப.சரவணன், மாவட்ட ஆட்சியருக்கு பரிந்துரை செய்தாா். அதன்பேரில், மாவட்ட ஆட்சியா் வே.விஷ்ணு உத்தரவின் பேரில், மாயாண்டியை குண்டா் சட்டத்தில் கைது செய்து பாளையங்கோட்டை மத்திய சிறையில் அடைத்தனா்.