உதய சூரியன் சின்னத்தில் போட்டியிடும் முக்குலத்தோர் புலிப்படை! - கருணாஸ்

திமுக கூட்டணியில் உதய சூரியன் சின்னத்தில் முக்குலத்தோர் புலிப்படை போட்டியிடவுள்ளது குறித்து...

தமிழக முதல்வர் மு.க. ஸ்டாலினுடன் முக்குலத்தோர் புலிப்படை கட்சியின் தலைவர் கருணாஸ் (கோப்புப் படம்) - எக்ஸ்

Updated On :26 மார்ச் 2026, 8:59 pm IST

திமுக கூட்டணியில் முக்குலத்தோர் புலிப்படை கட்சிக்கு ஒரு தொகுதி ஒதுக்கப்பட்டுள்ளதாக அக்கட்சியின் தலைவர் கருணாஸ் இன்று (மார்ச் 26) தெரிவித்துள்ளார். மேலும், உதய சூரியன் சின்னத்தில் போட்டியிடவுள்ளதாகவும் குறிப்பிட்டுள்ளார்.

திமுக தலைமையிலான கூட்டணியில் காங்கிரஸ், விடுதலைச் சிறுத்தைகள், தேமுதிக, மதிமுக, இந்திய கம்யூனிஸ்ட் கட்சி, இந்திய யூனியன் முஸ்லிம் லீக், கொங்குநாடு மக்கள் தேசிய கட்சி, ம.ம.க. உள்ளிட்ட கட்சிகளுக்கு இடங்கள் ஒதுக்கப்பட்டுள்ளன.

கூட்டணியில் எஞ்சியுள்ள கட்சிகளுக்கு தொகுதிகள் ஒதுக்கீடு செய்யும் பணிகள் இறுதிக்கட்டத்தை எட்டியுள்ளன.

இதனிடையே சென்னை அண்ணா அறிவாலயத்திற்கு முக்குலத்தோர் புலிப்படை கட்சிக்கு நேற்று அழைப்பு விடுக்கப்பட்டது. திமுக கூட்டணிப் பங்கீட்டுக் குழுவுடன் நடைபெற்ற பேச்சுவார்த்தையில் அக்கட்சிக்கு ஒரு தொகுதி ஒதுக்கப்பட்டது.

இதனிடையே இன்று மீண்டும் அண்ணா அறிவாலயத்திற்கு வருகைப்புரிந்த கருணாஸ் கூறியதாவது:

''தேர்தலில் போட்டியிட விருப்பப்பட்டியலில் 5 தொகுதிகளைக் கொடுத்திருந்தோம். இதில் ஒரு தொகுதி ஒதுக்கப்பட்டுள்ளது. எந்தத் தொகுதி என்பதை முதல்வர் நாளை அறிவிப்பார். உதய சூரியன் சின்னத்தில் போட்டியிடவுள்ளோம்.

திமுக தலைமையில் இதற்கு முன்பு இத்தனைக் கட்சிகள் கூட்டணியில் இருந்ததா எனத் தெரியவில்லை. இதுவே முதல்முறை என நினைக்கிறேன்'' எனப் பேசினார்.