வட மாநில மோசடி கும்பலை பிடிக்க சிறப்பு தனிப்படை மாநகர காவல் ஆணையா் தகவல்

 ஆன்லைன் மோசடியில் ஈடுபடும் பெரும்பாலானவா்கள் வட மாநிலத்தவா்களாக இருப்பதால் அவா்களை கண்டறிந்து கைது செய்வது பெரும் சவாலாக இருக்கிறது. வட மாநில மோசடி கும்பலை பிடிக்க திருநெல்வேலி மாநகர காவல்துறை சிறப்பு தனிப்படை அமைத்துள்ளது என்றாா் காவல் ஆணையா் ஏ.டி.துரைக்குமாா்.

திருநெல்வேலி மாநகர பகுதிகளில் கைப்பேசிகள் காணாமல் போனதாக பெறப்பட்ட புகாரின் அடிப்படையில் மாநகர சைபா் கிரைம் போலீஸாா் விசாரணை நடத்தி கைப்பற்றிய கைப்பேசிகளை உரியவா்களிடம் ஒப்படைக்கும் நிகழ்ச்சி திருநெல்வேலி மாநகர காவல் ஆணையா் அலுவலகத்தில் வியாழக்கிழமை நடைபெற்றது. காணாமல் போன நிலையில் கண்டுபிடிக்கப்பட்ட செல்லிடப்பேசிகளை காவல் ஆணையா் துரைக்குமாா் அதன் உரிமையாளா்களிடம் ஒப்படைத்தாா்.

பின்னா் அவா் செய்தியாளா்களிடம் கூறியது: திருநெல்வேலி மாநகரத்தில் கைப்பேசிகள் காணாமல் போனதாக பெறப்பட்ட புகாா்களின் அடிப்படையில் விசாரணை நடத்தி ரூ.33 லட்சத்து 5 ஆயிரத்து 500 மதிப்பிலான 233 கைப்பேசிகள் கண்டுபிடிக்கப்பட்டு உரியவா்களிடம் ஒப்படைக்கபட்டு வருகிறது.

இணையதளத்தில் பரிசு விழுந்ததாகவும், வேலை வாங்கித் தருவதாகவும் மோசடி செய்த நபா்கள் ஓடிபி, ஏடிஎம், கேஒய்சி போன்றவைகள் மூலம் நிகழ்ந்த மோசடி தொடா்பான புகாா்கள் அடிப்படையில் விசாரணை நடத்தி ரூ. 26 லட்சத்து 73 ஆயிரத்து 458 வங்கிகள் மூலம் மீட்கப்பட்டு உரிய நபா்களிடம் ஒப்படைக்கப்பட்டுள்ளது.

இணையதள பண மோசடி தொடா்பாக 23 புகாா்கள் பெறப்பட்டு மோசடியில் ஈடுபட்ட நபா்களின் வங்கிக் கணக்குகளை முடக்கி ரூ. 8 லட்சத்து 70 ஆயிரத்து 252 உரியவா்களுக்கு கிடைக்க நடவடிக்கை எடுக்கப்பட்டுள்ளது. சைபா் கிரைம், பண மோசடி தொடா்பாக தனிப்படை அமைக்கப்பட்டு மாநகரப் பகுதிகளில் கண்காணிப்பு பணிகள் நடைபெற்று வருகிறது.

ஆன்லைன் பண மோசடியில் ஈடுபட்டவா்கள் பெரும்பாலும் வட மாநிலத்தவா்கள் என்பது விசாரணையில் தெரியவந்துள்ளது. பண மோசடியில் ஈடுபட்ட வட மாநிலத்வா்கள் போலியான ஆவணங்களை வங்கிகளில் கொடுத்துள்ளதால் மோசடி நபா்களை கைது செய்வது சவாலாக உள்ளது. ஆன்லைன் பண மோசடியில் ஈடுபட்ட வட மாநிலத்தவா்களை கைது செய்ய திருநெல்வேலி மாநகர காவல்துறை சாா்பில் சிறப்பு தனிப்படை அமைக்கப்பட்டுள்ளது.

இந்த சிறப்பு தனிப்படையினா் வட மாநிலத்தில் முகாமிட்டு மோசடியாளா்களை கைது செய்ய நடவடிக்கை எடுக்கப்பட்டுள்ளது. அவா்கள் விரைவில் வட மாநில மோசடி கும்பலை கைது செய்வாா்கள் என்றாா் அவா்.

அப்போது, துணை காவல் ஆணையா்கள் டி.பி.சுரேஷ்குமாா் (கிழக்கு), கே.சுரேஷ்குமாா் (மேற்கு) உள்ளிட்டோா் உடனிருந்தனா்.