திருநெல்வேலி: இஸ்லாமியர்களின் புனித பண்டிகையான பக்ரீத் பண்டிகை நெல்லை மேலப்பாளையம் மற்றும் மாவட்ட பகுதியில் சிறப்பு கூட்டுத்தொழுகையுடன் கொண்டாடப்பட்டது.
நெல்லை மேலப்பாளையத்தில் நடந்த தொழுகையில் முன்னாள் அமைச்சர் டி.பி.எம்.மைதீன்கான், பாளையங்கோட்டை சட்டப்பேரவை உறுப்பினர் அப்துல்வகாப் கலந்து கொண்டனர்.
இஸ்லாமியர்களின் புனித பண்டிகையான பக்ரீத் பண்டிகை இன்று நாடு முழுவதும் கொண்டாடப்பட்டு வருகிறது. நெல்லை மாநகரம் மற்றும் மாவட்ட பகுதிகளில் வழக்கமான உற்சாகத்துடன் கொண்டாடப்பட்டது.
நெல்லை மேலப்பாளையத்தில் பஜார் திடல், மாநகராட்சி மைதானம், பாளையங்கோட்டை, கேடிசி நகர் உள்ளிட்ட இடங்களில் சிறப்பு கூட்டுத்தொழுகை நடைபெற்றது. தொழுகையில் இஸ்லாமிய மக்கள் புத்தாடை அணிந்து கலந்து கொண்டதுடன் ஒருவருக்கொருவர் கட்டித் தழுவி வாழ்த்துகளையும் பகிர்ந்து கொண்டனர்.
தொடர்ந்து இஸ்லாமிய மக்கள் தங்கள் ஐந்து கடமைகளில் ஒன்றான ஏழைகளுக்கு உதவுதல் என்பதன் அடிப்படையில் ஏழை எளிய மக்களுக்கு அரிசி, பணம், இறைச்சி ஆகியவற்றை தானமாக வழங்கினர்.
மேலப்பாளையம் ஜின்னா திடலில் நடைபெற்ற தொழுகையில் நெல்லை மத்திய மாவட்ட திமுக பொறுப்பாளரும், முன்னாள் அமைச்சருமான டி.பி.எம்.மைதீன்கான், பாளையங்கோட்டை திமுக சட்டப்பேரவை உறுப்பினர் அப்துல்வகாப் ஆகியோர் கலந்துகொண்டு தொழுதனர்.
இந்த நிகழ்ச்சியில் திமுக பகுதி செயலாளர் துபாய் சாகுல் உள்ளிட்ட பலர் கலந்து கொண்டனர்.
மேலப்பாளையத்தில் பல்வேறு பகுதிகளில் நடந்த தொழுகையில் பெண்கள் உள்பட ஆயிரத்திற்கும் மேற்பட்டவர்கள் கலந்து கொண்டனர். நகராட்சி உறுப்பினர் ரம்ஸான் அலி உள்ளிட்டவர்கள் கலந்து கொண்டனர்.
இதுபோன்று மாவட்டத்தில் ஏர்வாடி, களக்காடு, பத்தமடை, பேட்டை என இஸ்லாமிய மக்கள் அதிகம் வசிக்கும் பகுதிகளிலும் பக்ரீதபண்டிகை உற்சாகமாக கொண்டாடப்பட்டது .