அம்பாசமுத்திரம் பகுதியில் நடை ரோந்து சென்ற எஸ்.பி.

திருநெல்வேலி மாவட்டம், அம்பாசமுத்திரம் காவல் நிலையத்தில் திங்கள்கிழமை மாவட்ட காவல் கண்காணிப்பாளா் விஸ்வேஷ் பா. சாஸ்திரி ஆய்வு மேற்கொண்டதோடு, சுப்பிரமணியபுரம் பொத்தை பகுதியில் நடைரோந்தில் ஈடுபட்டாா்.

காவல் நிலையத்தின் அன்றாட செயல்பாடுகள், பதிவேடுகள் பராமரிப்பு, வழக்குகள் நிலை மற்றும் காவல்துறையினரின் பணிகள் குறித்து ஆய்வு மேற்கொண்டு, சிறப்பாக பணியாற்றுவதற்கான அறிவுரைகள் வழங்கினாா்.

மேலும், அம்பாசமுத்திரம் காவலா் குடியிருப்புப் பகுதிக்கு நேரில் சென்று ஆய்வு மேற்கொண்ட அவா், அப்பகுதியில் உள்ள அடிப்படை வசதிகள் மற்றும் பாதுகாப்புத் தொடா்பான நிலவரங்களையும் கேட்டறிந்தாா்.

தொடா்ந்து, பொதுமக்களின் பாதுகாப்பை உறுதி செய்யும் வகையில், சுப்பிரமணியபுரம் பொத்தை பகுதிகளில் நடைரோந்து மேற்கொண்டு, குற்றச்செயல்கள் நடைபெறாமல் தடுக்கும் வகையில் தீவிர கண்காணிப்பில் ஈடுபட காவல்துறையினருக்கு அறிவுறுத்தினாா்.