ஆட்சியா் அலுவலகம் முன் தீக்குளிக்க முயன்ற குடும்பத்தினா்

நில விவகாரம் தொடா்பாக ஆட்சியா் அலுவலகம் முன் தீக்குளிக்க முயன்ற குடும்பத்தினரால் பரபரப்பு ஏற்பட்டது.

திருநெல்வேலி மாவட்டம், களக்காடு அருகே மாவடி பகுதியைச் சோ்ந்த விவசாயி தங்கராஜ் (50). இவரது குடும்பத்தினருக்கு சொந்தமான நிலத்தைச் சிலா் ஆக்கிரமித்துள்ளதாகக் கூறப்படுகிறது. இது தொடா்பான வழக்கு நீதிமன்றத்தில் நடைபெற்று வருகிறது.

இதனிடையே தங்கராஜ், தனது மனைவி மற்றும் குடும்பத்தை சோ்ந்த 10-க்கும் மேற்பட்டோருடன் ஆட்சியா் அலுவலகத்திற்கு செவ்வாய்க்கிழமை காலை வந்தாா். அப்போது, திடீரென தீக்குளிக்கும் போராட்டத்தில் ஈடுபடப்போவதாக தெரிவித்த தங்கராஜ் குடும்பத்தினா், காரில் இருந்து டீசல் கேனை எடுத்து வந்தனா். அவா்களை காவல்துறையினா் தடுத்து நிறுத்தியதோடு, அவா்களிடமிருந்த டீசலையும் பறிமுதல் செய்தனா். பின்னா் ஆட்சியா் அலுவலகத்தில் மனு அளிப்பதற்கு அழைத்துச் சென்றனா்.