தமிழ்நாடு சுற்றுலா விருதுக்கு விண்ணப்பிக்கலாம்

சுற்றுலாவில் சிறந்த பங்களிப்பை நல்கிய திருநெல்வேலி மாவட்டத்தைச் சோ்ந்தவா்கள் தமிழ்நாடு சுற்றுலா விருதுகளுக்கு விண்ணப்பிக்கலாம் என மாவட்ட ஆட்சியா் ஆனந்த் மோகன் தெரிவித்துள்ளாா்.

இது தொடா்பாக அவா் வெளியிட்டுள்ள செய்திக்குறிப்பு: சுற்றுலாத் துறையின் மூலம் அனைத்து சுற்றுலா ஏற்பாட்டாளா்கள், சுற்றுலா தொழில் முனைவோா்கள், ஹோட்டல் முகவா்களுக்கு அரசு விருது வழங்கி சிறப்பித்து வருகிறது.

அந்த வகையில், தமிழ்நாட்டிற்கான சிறந்த சுற்றுலா ஏற்பாட்டாளா், சிறந்த உள்நாட்டு சுற்றுலா ஏற்பாட்டாளா், சிறந்த பயண பங்குதாரா், சிறந்த தங்குமிடம், சிறந்த உணவகம், தங்குமிடம் மற்றும் படகு இல்லம், சுற்றுலா ஊக்குவிப்பிற்கான சிறந்த மாவட்டம், சுத்தமான சுற்றுலாத்தலம், பல்வேறு சுற்றுலாப்பிரிவுகளின் சிறந்த ஏற்பாட்டாளா், சிறந்த சிறப்பு சுற்றுலா நிறுவனம், சிறந்த மருத்துவ மற்றும் ஆரோக்கிய சுற்றுலா நிறுவனம், சிறந்த சாகச மற்றும் தங்கும் முகாம்கள் சுற்றுலா ஏற்பாட்டாளா், சிறந்த சுற்றுலா வழிகாட்டி, சுற்றுலா மற்றும் விருந்தோம்பலில் சிறந்த கல்வி நிறுவனம் போன்ற13 வகையான தமிழ்நாடு சுற்றுலா விருதுகள் வழங்கப்படவுள்ளன.

எனவே, திருநெல்வேலி மாவட்டத்தில் தகுதியானவா்கள் செப். 30-ஆம் தேதிக்குள் இணையதளத்தில் விண்ணப்பிக்கலாம் எனக் கூறியுள்ளாா்.