எட்டயபுரம்,குளத்தூரை புதிய ஊராட்சி ஒன்றியங்களாக்க வலியுறுத்தல்

தூத்துக்குடி மாவட்டத்தில் எட்டயபுரம் மற்றும் குளத்தூரை தலைமையிடமாகக் கொண்டு புதிய ஊராட்சி ஒன்றியங்கள் உருவாக்கப்பட வேண்டும் என வலியுறுத்தப்பட்டுள்ளது.

தமிழ்நாடு ஊரக வளர்ச்சித் துறை அலுவலர்கள் சங்க மாவட்ட பேரவைக் கூட்டம் தூத்துக்குடி அரசு ஊழியர் சங்க அலுவலகத்தில் சனிக்கிழமை நடைபெற்றது. இக்கூட்டத்துக்கு சங்கத்தின் மாவட்டத் தலைவர் ராகவன் தலைமை வகித்தார். செயலர் பார்த்தசாரதி, பொருளாளர் அன்டோ ஆகியோர் முன்னிலை வகித்தனர். தமிழ்நாடு ஊரக வளர்ச்சித் துறை அலுவலர் சங்க மாநில துணைத் தலைவர் சுமதி சிறப்பு அழைப்பாளராக கலந்துகொண்டு சங்கத்தின் செயல்பாடுகள் குறித்துப் பேசினார். அரசு ஊழியர் சங்க தூத்துக்குடி மாவட்டத் தலைவர் ராமமூர்த்தி, செயலர் வெங்கடேசன் ஆகியோர் வாழ்த்திப் பேசினர்.

கூட்டத்தின்போது, ஊராட்சிகளில் காலியாக உள்ள ஊராட்சி செயலர் பணியிடங்களை நிரப்ப வேண்டும். மாவட்ட ஆட்சியர் உள்ளிட்ட உயர் அதிகாரிகள் விடுமுறை தினங்களில் கள ஆய்வு மேற்கொள்வதை தவிர்க்க வேண்டும். எட்டயபுரம், குளத்தூர் ஆகியவற்றை தலைமையிடமாகக் கொண்டு புதிதாக ஊராட்சி ஒன்றியங்கள் உருவாக்கப்பட  வேண்டும் என்பன உள்ளிட்ட பல்வேறு தீர்மானங்கள் நிறைவேற்றப்பட்டன.