புரட்டாசி 2 ஆவது சனிக்கிழமை வன திருப்பதி கோயிலில் பக்தர்கள் சுவாமி தரிசனம்

வன திருப்பதி ஸ்ரீநிவாசப்பெருமாள் கோயிலில் புரட்டாசி 2வது சனிக்கிழமையையொட்டி பக்தர்கள் நீண்ட வரிசையில் நின்று சுவாமி தரிசனம் செய்தனர். 

குரும்பூர் அருகே உள்ள புன்னைநகர் வன திருப்பதி ஸ்ரீநிவாச பெருமாள் கோயிலில் புரட்டாசி 2ஆவது சனிக்கிழமையையொட்டி அதிகாலை 5 மணிக்கு நடைதிறக்கப்பட்டு  கோ பூஜை, 6 மணிக்கு மூலவர் திருமஞ்சனம்,காலை 8:30 மணிக்கு திருவாராதனம், தளிகை மற்றும் சாத்துமுறை கோஷ்டி நடைபெற்றது. இதில் பக்தர்கள் நீண்டவரிசையில் நின்று கோவிந்தா, கோவிந்தா என  முழக்கமிட்டபடி சுவாமி தரிசனம் செய்தனர்.

இதையொட்டி பக்தர்களுக்கு காலை 10 மணி முதல் ஆலய நிர்வாகம் சார்பில் அன்னதானம் செய்யப்பட்டது. மேலும் அரசுப் போக்குவரத்துக் கழகம் சார்பில் திருநெல்வேலி, திருச்செந்தூர், தூத்துக்குடி  பகுதிகளில் இருந்து சிறப்பு பேருந்துகள் இயக்கப்பட்டன. 

ஏற்பாடுகளை கோயில் நிர்வாக கைங்கர்யதாரர் பி.ராஜ கோபால் தலைமையில் நிர்வாகிகள்,பணியாளர்கள் செய்திருந்தனர்.