சமையல் எரிவாயு உருளைகளுக்கு கூடுதல் தொகை செலுத்தவேண்டாம்: ஆட்சியர்

தூத்துக்குடி மாவட்டத்தில் சமையல் எரிவாயு உருளைகளுக்கு கூடுதல் தொகை செலுத்தவேண்டாம் என  மாவட்ட ஆட்சியர் சந்தீப் நந்தூரி தெரிவித்துள்ளார்.
இதுகுறித்து அவர் வெளியிட்ட செய்திக்குறிப்பு: தூத்துக்குடி மாவட்டத்தில் இந்தியன் ஆயில் நிறுவன வீட்டு உபயோக எரிவாயு உருளை விலை தூத்துக்குடியில் ரூ. 856  ஆகவும், கோவில்பட்டியில் ரூ. 854.50 ஆகவும், கழுகுமலையில் ரூ. 862.50 ஆகவும், கயத்தாறில் ரூ. 858 ஆகவும், எட்டையபுரத்தில் ரூ. 854.50 ஆகவும், சாத்தான்குளம் பகுதிக்கு ரூ. 872.50 எனவும் நிர்ணயம் செய்யப்பட்டுள்ளது.
இதேபோல, பாரத் பெட்ரோலியம் நிறுவன வீட்டு உபயோக எரிவாயு உருளை விலை தூத்துக்குடி மாவட்டத்துக்கு  ரூ. 856 எனவும், ஹிந்துஸ்தான் பெட்ரோலியம் நிறுவன வீட்டு உபயோக எரிவாயு உருளை விலை தூத்துக்குடி மாவட்டத்துக்கு ரூ. 856 எனவும் ஆகஸ்ட் 1 ஆம் தேதி முதல் எரிவாயு நிறுவனங்களால் நிர்ணயம் செய்யப்பட்டுள்ளது.
எனவே, நுகர்வோர்கள் எரிவாயு முகவர்களிடமிருந்து வாங்கும் வீட்டு உபயோக எரிவாயு உருளைக்கு நிர்ணயிக்கப்படுள்ள தொகைக்கு அதிகமாக பணம் செலுத்த தேவையில்லை எனத் தெரிவிக்கப்பட்டுள்ளது.