காமராஜர் விருது பெற்ற மாணவிக்கு பாராட்டு

தமிழக அரசின் சார்பில் காமராஜர் விருது பெற்ற கோவில்பட்டி நாடார் மேல்நிலைப்பள்ளி மாணவி மெளனிகாவுக்கு பாராட்டு விழா பள்ளி வளாகத்தில் நடைபெற்றது.
 ஒவ்வொரு கல்வியாண்டிலும் கல்வி மற்றும் தனித்திறன் போட்டிகளில் சிறப்பிடம் பெறும், தமிழ் வழியில் பயிலும் மாணவ மாணவியருக்கு காமராஜர் விருது வழங்கி தமிழக அரசு சிறப்பித்து வருகிறது. அதன்படி, 2017 - 2018ஆம் கல்வியாண்டிற்கான காமராஜர் விருது மாணவி மெளனிகாவுக்கு கிடைத்துள்ளது. சென்னையில் நடைபெற்ற ஆசிரியர் தினவிழாவில் மெளனிகா தமிழக அரசின் சார்பில் வழங்கப்பட்ட சான்றிதழ் மற்றும் ஊக்கத்தொகை ரூ.10 ஆயிரத்துக்கான காசோலையைப் பெற்றார்.
இந்த மாணவியை நாடார் உறவின்முறை சங்கத் தலைவர் ஏ.பி.கே.பழனிசெல்வம், துணைத் தலைவர் செல்வராஜ், சங்கச் செயலர் ஜெயபாலன், பள்ளிச் செயலர் ஆர்.எஸ். ரமேஷ், பள்ளியின் பொருளாளர் சண்முகராஜா, தலைமையாசிரியர் வடிவேல் மற்றும் நிர்வாக குழு உறுப்பினர்கள்,  ஆசிரியர்கள் பாராட்டினர்.