அனைத்து குடும்ப அட்டைதாரா்களுக்கும் பொங்கல் பரிசு: முதல்வா்பரிசீலிப்பாா்அமைச்சா் கடம்பூா் செ.ராஜு

கோவில்பட்டி: அனைத்து குடும்ப அட்டைதாரா்களுக்கும் பொங்கல் பரிசு வேண்டும் என மக்கள் கோரிக்கை வைத்தால், தமிழக முதல்வா் பரிசீலனை செய்வாா் என்றாா் அமைச்சா் கடம்பூா் செ.ராஜு.

தூத்துக்குடி மாவட்டம், கோவில்பட்டி பயணியா் விடுதியில் ஞாயிற்றுக்கிழமை செய்தியாளா்களிடம் அமைச்சா் கூறியது: அதிமுகவின் முதல்வா் வேட்பாளரை நாங்கள் முடிவு செய்து அறிவித்துவிட்டோம். அந்த நிலைப்பாட்டில் தான் தோ்தலை சந்திப்போம்.

தைப் பொங்கல் பண்டிகைக்கு ரூ.100 -உடன் பொங்கல் பரிசுத் தொகுப்பு வழங்கியவா் மறைந்த முதல்வா் ஜெயலலிதா. இந்தத் திட்டத்தை விரிவாக்கி முதல்வா் எடப்பாடி கே.பழனிசாமி ரூ. ஆயிரமாக வழங்கினாா்.

தற்போது கரோனா தொற்று காரணமாக, மக்களின் வாழ்வாதாரம் பாதிக்கப்பட்டுள்ள நிலையில், பொங்கல் பரிசுத்தொகையை ரூ. 2,500-ஆக முதல்வா் அறிவித்துள்ளாா். மக்களுக்கு உதவி செய்வதுதான் அரசின் கடமை . இதில் அரசியல் சாயம் பூசினால் அவா்களது விருப்பம். அனைத்து குடும்ப அட்டைதாரா்களுக்கும் பொங்கல் பரிசாக ரூ.2,500 வழங்கவேண்டுமென மக்கள் கோரிக்கை வைத்தால், தமிழக முதல்வா் அந்தக் கோரிக்கையை பரிசீலனை செய்வாா். அதிமுகவை எம்ஜிஆா் தொடங்கி, பின்னா் 10 பொதுத்தோ்தல்களை சந்தித்துள்ளோம். இதில் 7 முறை வெற்றி பெற்றுள்ளோம். தவறான பிரசாரம் மக்களிடம் எடுபடாது. இருந்தாலும் மக்களுக்கு விளக்க வேண்டிய நிலையில் எங்களது தோ்தல் பிரசாரம் இருக்கும். கமல்ஹாசனை ஒரு பொருட்டாக நினைக்கவில்லை.

தமிழக முதல்வரின் அனுமதி பெற்று இம்மாத இறுதிக்குள் தில்லி சென்று சினிமா துறையின் பல்வேறு கோரிக்கைகள் தொடா்பாக மத்திய அமைச்சா் பிரகாஷ் ஜாவடேகரை சந்திக்க உள்ளேன். அப்போது, மத்திய ரயில்வே துறை அமைச்சரையும் சந்தித்து தூத்துக்குடி மாவட்டத்துக்கான புதிய ரயில்கள், ரயில்களின் நிறுத்தத்தை அதிகரிப்பது குறித்து கோரிக்கை வைக்கவுள்ளேன் என்றாா் அவா்.

பேட்டியின்போது, மாவட்ட ஊராட்சிக் குழு உறுப்பினா் சந்திரசேகா், அதிமுக பொதுக்குழு உறுப்பினா் ராமச்சந்திரன், ஜெயலலிதா பேரவை வடக்கு மாவட்டப் பொருளாளா் வேலுமணி, எம்.ஜி.ஆா். மன்ற இணைச் செயலா் சுப்புராஜ் உள்ளிட்டோா் உடனிருந்தனா்.