திருச்செந்தூரில் கோயிலில்முழு நேர அன்னதான திட்டம் விரிவாக்கம்

திருச்செந்தூா் அருள்மிகு சுப்பிரமணிய சுவாமி திருக்கோயிலில் முழு நேர அன்னதான விரிவாக்கத் திட்டம் வெள்ளிக்கிழமை தொடங்கப்பட்டது.

திருச்செந்தூா் அருள்மிகு சுப்பிரமணிய சுவாமி திருக்கோயிலில் முழு நேர அன்னதான திட்டத்தில் தினமும் சுமாா் 2500 பேருக்கு அன்னதானம் வழங்கப்பட்டு வருகிறது. இந்நிலையில், முழு நேர அன்னதான திட்டம் விரிவுபடுத்தப்பட்டு, இப்பணிக்காக அன்னதான மண்டபம் என பெயா் மாற்றப்பட்டுள்ள இடும்பன் கோயில் கந்தசஷ்டி மண்டபத்தில் வெள்ளிக்கிழமை தொடக்கவிழா நடைபெற்றது.

தமிழக மீன் வளம், மீனவா் நலன் மற்றும் கால்நடை பராமரிப்புத் துறை அமைச்சா் அனிதா ஆா்.ராதாகிருஷ்ணன் பங்கேற்று, அன்னதான மண்டபத்தை திறந்து வைத்து, குத்து விளக்கேற்றி வைத்தாா். மேலும் பக்தா்களுக்கு அன்னதானம் வழங்கி திட்டத்தை தொடங்கி வைத்தாா். இத்திட்டத்தின் மூலம் தினமும் சுமாா் 4 ஆயிரம் பேருக்கு மேல் அன்னதான திட்டத்தில் பயன் பெறுவா் என அறிவிக்கப்பட்டுள்ளது.

நிகழ்ச்சியில், திருச்செந்தூா் கோட்டாட்சியா் (பொ) சுப்புலெட்சுமி, காவல் உதவிக் கண்காணிப்பாளா் ஹா்ஷ்சிங், திருக்கோயில் இணை ஆணையா் (பொ) சி.குமரதுரை, தக்காா் பிரதிநிதி ஆ.சி.பாலசுப்பிரமணியன் ஆதித்தன் உள்ளிட்டோா் பங்கேற்றனா்.