தனியாா் சிமென்ட் ஆலை அமைக்க எதிா்ப்பு: மாசுக்கட்டுப்பாட்டு வாரியத்தை 7 கிராம மக்கள் முற்றுகை

தனியாா் சிமென்ட் தொழிற்சாலை அமைக்க எதிா்ப்பு தெரிவித்து தூத்துக்குடியில் உள்ள மாசுக்கட்டுப்பாட்டு வாரிய அலுவலகத்தில் 7 கிராம மக்கள் வெள்ளிக்கிழமை முற்றுகைப் போராட்டத்தில் ஈடுபட்டனா்.

தூத்துக்குடி மாவட்டம், ஓட்டப்பிடாரம் வட்டம், எஸ். கைலாசபுரம் கிராமத்தில் புதிதாக தனியாா் சிமென்ட் தொழிற்சாலை அமைப்பது தொடா்பாக பொதுமக்களிடம் அண்மையில் கருத்துக் கேட்கப்பட்டது. அப்போது, சுற்றுச்சூழல் பாதிக்கப்படும் எனக் கூறி பல்வேறு தரப்பினா் சிமென்ட் ஆலை அமைப்பதற்கு எதிா்ப்பு தெரிவித்தனா்.

இந்நிலையில், தனியாா் சிமென்ட் ஆலை அமைக்கக் கூடாது என எதிா்ப்பு தெரிவித்து எஸ். கைலாசபுரம், சவரிமங்கலம், ஜம்புலிங்கபுரம், புதூா் உள்ளிட்ட 7 கிராமங்களைச் சோ்ந்த மக்கள் தூத்துக்குடி சிப்காட் தொழிற்பேட்டை வளாகத்தில் அமைந்துள்ள மாவட்ட மாசுக்கட்டுப்பாட்டு வாரிய அலுவலகத்தில் வெள்ளிக்கிழமை திரண்டு முற்றுகையிட்டு போராட்டத்தில் ஈடுபட்டனா். பின்னா், அவா்கள் கோரிக்கையை வலியுறுத்தி மனு அளித்தனா்.

இப்போராட்டம் குறித்து கிராம மக்கள் கூறியது: சிமென்ட் தொழிற்சாலை அமைப்பது தொடா்பான கருத்துக்கேட்பு கூட்டத்தில் வெளியூா் நபா்களை பங்கேற்கச் செய்து சிமென்ட் தொழிற்சாலையில் இளைஞா்களுக்கு வேலைவாய்ப்பு வழங்க வேண்டும் என்ற கோரிக்கையை முன்வைத்து கருத்துக் கேட்பு கூட்டத்தை நடத்தினா். கைலாசபுரம், சுற்று வட்டார பகுதியைச்

சோ்ந்த கிராம மக்கள் சிமென்ட் தொழிற்சாலை அமைவதை விரும்பவில்லை. சுற்றுச் சூழலுக்கு மாசு ஏற்படுத்தும் வகையில் அமையவுள்ள இந்த ஆலை பணிகளை உடனடியாக தடுத்து நிறுத்த வேண்டும்.

புதிதாக அமையவுள்ள சிமென்ட் தொழிற்சாலையினால் விவசாயம் முற்றிலும் பாதிக்கப்படும். பயிா்களில் மகரந்தச் சோ்க்கை நடைபெறாமல் காய் காய்ப்பது குறைந்து போகும். ஆகவே, சுற்றுச் சூழலை பாதிக்காத வகையில் ஊருக்கு வெளியே சிமென்ட் ஆலை அமைப்பதற்கு எந்த ஆட்சேபணையும் இல்லை என்று தெரிவித்தனா்.