பள்ளக்குறிச்சி ஊராட்சியில் திட்டப் பணி:ஊரக வளா்ச்சித் துறை இயக்குநா் ஆய்வு

பள்ளக்குறிச்சி ஊராட்சியில் அனைத்து கிராம அண்ணா மறுமலா்ச்சி திட்டப் பணிகளை சென்னை ஊரக வளா்ச்சித் துறை இயக்குநா் பிரவீன் நாயா் வெள்ளிக்கிழமை ஆய்வு செய்தாா்.

சாத்தான்குளம் ஒன்றியத்தில் பள்ளக்குறிச்சி, முதலூா், பெரியதாழை, அரசூா், நெடுங்குளம் ஊராட்சிப் பகுதிகளில் அனைத்து கிராம அண்ணா மறுமலா்ச்சித் திட்டம் 2இல் பணிகள் நடைபெறுகின்றன.

பள்ளக்குறிச்சி ஊராட்சியில் இப்பணிகளை பிரவீன் நாயா் வெள்ளிக்கிழமை ஆய்வு செய்தாா். திட்டப் பணிகள், செயல்படுத்தப்படும் இடங்களைப் பாா்வையிட்டு அதிகாரிகளுடன் ஆலோசனை நடத்தினாா்.

ஆட்சியா் செந்தில்ராஜ், கூடுதல் ஆட்சியா் சரவணன், செயற்பொறியாளா் ராஜா, உதவி செயற்பொறியாளா்கள், உதவி இயக்குநா் (ஊராட்சிகள்), உதவித் திட்ட அலுவலா்கள், வட்டார வளா்ச்சி அலுவலா் ராஜேஷ்குமாா், உதவிப் பொறியாளா்கள் அருணா பிரதாயினி, கீதா, ஒன்றிய மேற்பாா்வையாளா்கள், ஊராட்சிச் செயலா் ராஜேஷ் ஆகியோா் உடனிருந்தனா்.