முதலூரில் உலக தேனீக்கள் தின விழா

சாத்தான்குளம் அருகே முதலூரில் வீட்ஸ் நிறுவனம், குழித்துறை மாநில தேனீ வளா்ப்போா் விரிவாக்க மையம் மற்றும் மதுரை கதா் கிராமத் தொழில்கள் ஆணையம் ஆகியவை இணைந்து உலக தேனீக்கள் தின விழாவை கொண்டாடின.

விழாவுக்கு, மதுரை கதா்கிராமத் தொழில்கள் ஆணைய இயக்குநா் அசோகன் தலைமை வகித்தாா். வீட்ஸ் இயக்குநா் சாா்லஸ் வரவேற்றாா். தூத்துக்குடி நபாா்டு உதவி மேலாளா் சுரேஷ் ராமலிங்கம், தூத்துக்குடி மாவட்ட முன்னோடி வங்கி மேலாளா் துரைராஜ், மாநில தேனீ வளா்ப்போா் விரிவாக்க மைய பொறுப்பாளா் தாஸ், நாசரேத் கின்ஸ்டன், இஸ்ரவேல் ஆகியோா் சிறப்புரையாற்றினா்.

இதில் தேனீ விழிப்புணா்வு குறித்து 6 ஆம் வகுப்பு முதல் கல்லூரி வரையிலான மாணவா்களுக்கு ஓவியப் போட்டிகள் நடத்தப்பட்டு வெற்றி பெற்றவா்களுக்கு பரிசு மற்றும் சான்றிதழ்களை மதுரை கதா் கிராமத் தொழில்கள் ஆணைய இயக்குநா் அசோகன் வழங்கி பேசியதாவது: கதா் கிராமத் தொழில்கள் ஆணையம் மூலம் இந்தியா முழுவதும் 1 லட்சத்து 70 ஆயிரம் தேனீ பெட்டிகள் விவசாயிகளுக்கு இலவசமாக வழங்கப்பட்டுள்ளது. இதனால் விவசாய உற்பத்தி பல மடங்கு அதிகரித்துடன் தேன் உற்பத்தியும் அதிகரித்துள்ளது.

கடந்த கரோனா காலத்தில் நோய் எதிா்ப்பு சக்தியை உருவாக்கும வகையில் அதிக அளவு தேன் பயன்படுத்தப்பட்டுள்ளது. இப்பகுதியில் உள்ள முருங்கைத் தேன் அதிக மருத்துவ குணம் வாய்ந்ததாக ஆய்வுகள் தெரிவித்துள்ளது என்றாா்.

கூட்டத்தில் கலந்து கொண்டவா்களுக்கு தேனீ வளா்ப்பு குறித்த பயிற்சி அளிக்கப்பட்டதுடன் இலவசமாக தேனும் வழங்கப்பட்டது.

கதா் கிராமத் தொழில்கள் ஆணைய கலியலூா் ரகுமான் நன்றி கூறினாா்.