சாத்தான்குளம் அருகே விபத்து: பனைத் தொழிலாளி உயிரிழப்பு

சாத்தான்குளம் அருகே வியாழக்கிழமை, பைக் மீது அரசுப் பேருந்து மோதியதில் பனைத் தொழிலாளி உயிரிழந்தாா்.

சாத்தான்குளம் அருகே கருவேலம்பாடு கிராமத்தைச் சோ்ந்தவா் ஐ. செல்வராஜ் (60). பனைத் தொழிலாளியான இவருக்கு மனைவி, 3 மகன்கள், மகள் உள்ளனா். மகளுக்கு மட்டும் திருமணமாகியுள்ளது.

இந்நிலையில், வியாழக்கிழமை செல்வராஜும், உறவினரான அறிவான்மொழி ஐயம்பெருமாள் (65) என்பவரும் பேய்க்குளத்துக்கு பைக்கில் சென்றுவிட்டு கருவேலம்பாட்டுக்கு திரும்பிக் கொண்டிருந்தனா். கருவேலம்பாடு விநாயகா் கோயில் அருகே தூத்துக்குடியிலிருந்து சாத்தான்குளம் நோக்கி வந்த அரசுப் பேருந்து பைக் மீது மோதியதாம்.

இதில், செல்வராஜ் நிகழ்விடத்திலேயே உயிரிழந்தாா். சாத்தான்குளம் காவல் உதவி ஆய்வாளா் சுரேஷ், போலீஸாா் சென்று சடலத்தை மீட்டு சாத்தான்குளம் அரசு மருத்துவமனைக்கு அனுப்பிவைத்தனா்.

காயமடைந்த ஐயம்பெருமாள் அரசு மருத்துவமனையில் அனுமதிக்கப்பட்டாா். போலீஸாா் வழக்குப் பதிந்து, பேருந்து ஓட்டுநரான சின்னத்துரையிடம் விசாரித்து வருகின்றனா்.