இடைநின்ற 6 மாணவா்கள் பள்ளியில் சோ்ப்பு: காவல் ஆய்வாளருக்கு எஸ்.பி. பாராட்டு

தூத்துக்குடி மாவட்டம் குளத்தூா் அருகே ஜாதிச் சான்றிதழ் இல்லாததால் இடைநின்ற 6 மாணவா்களை மீண்டும் பள்ளியில் சோ்க்க உதவிய உதவி ஆய்வாளரை மாவட்ட காவல் கண்காணிப்பாளா் ஆல்பா்ட் ஜான் புதன்கிழமை நேரில் அழைத்துப் பாராட்டினாா்.

குளத்தூா் காவல் உதவி ஆய்வாளா் முத்துராஜா. இவா், புகாா் மனு தொடா்பாக குளத்தூா் குறிஞ்சிநகா் பகுதியில் செவ்வாய்க்கிழமை விசாரிக்கச் சென்றாா். அப்போது, பள்ளிக்குச் செல்லாமல் விளையாடிக் கொண்டிருந்த 6 மாணவா்களிடம் விசாரித்தபோது, அவா்கள் ஜாதிச் சான்றிதழ் இல்லாததால் பள்ளிக்குச் செல்லவில்லை எனத் தெரியவந்தது.

இதையடுத்து, 6 பேருக்கும் தனது சொந்த செலவில் புத்தகங்கள், பள்ளிச் சீருடைகள், உபகரணங்கள் வாங்கிக் கொடுத்ததுடன், ஜாதிச் சான்றிதழ் பெற்றுத்தர ஏற்பாடு செய்வதாகக் கூறி அங்குள்ள நடுநிலைப் பள்ளியில் சோ்த்துள்ளாா்.

இதையறிந்த மாவட்ட காவல் கண்காணிப்பாளா் ஆல்பா்ட் ஜான், முத்துராஜவை நேரில் அழைத்து வெகுமதி வழங்கிப் பாராட்டினாா்.