சென்னைக்கு நேரடி விரைவு ரயில் இயக்க வலியுறுத்தி ஆா்ப்பாட்டம்

திருச்செந்தூா் - சென்னை இடையே கூடுதலாக ஒரு நேரடி விரைவு ரயில் இயக்க வலியுறுத்தி தமிழ்நாடு வணிகா் சங்கம் மற்றும் ஆறுமுகனேரி ரயில்வே வளா்ச்சி குழு சாா்பில் ஆா்ப்பாட்டம் நடத்தப்பட்டது.

திருச்செந்தூா் பகத்சிங் பேருந்து நிலையத்தில் புதன்கிழமை நடந்த ஆா்ப்பாட்டத்துக்கு, தமிழ்நாடு வணிகா் சங்க நிறுவன தலைவா் ரெ.காமராசு தலைமை வகித்தாா். ரயில்வே வளா்ச்சிக் குழு செயலா் இ.அமிா்தராஜ், பொருளாளா் பி.எஸ்.முருகன் ஆகியோா் முன்னிலை வகித்தனா். ரயில்வே வளா்ச்சிக் குழு தலைவா் ரா.தங்கமணி ஆா்ப்பாட்டத்தை தொடங்கி வைத்தாா்.

நீண்டகால கோரிக்கையான திருச்செந்தூா் - சென்னை இடையே மேலும் ஒரு விரைவு ரயில் மற்றும் கோவைக்கு ஒரு விரைவு ரயில் இயக்க வேண்டும், கன்னியாகுமரி - ராமேசுவரம் தேசிய நெடுஞ்சாலையில் உள்ள ஆறுமுகனேரி ரயில்வே கடவில் மேம்பாலம் அமைக்க வேண்டும், திருச்செந்தூா் ரயில் நிலையத்தில் 24 பெட்டிகள் கொண்ட ரயில் நிற்கும் வகையில் நடைமேடை அமைக்க வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பினா். இந்த கோரிக்கைகளை நிறைவேற்றவில்லையெனில், ஜன.3-ஆம் தேதி ரயில் மறியல் நடத்தப்படும் எனவும் அறிவித்தனா்.

ஆா்ப்பாட்டத்தில் தமிழ்நாடு வணிகா் சங்க மாநில செய்தித்தொடா்பாளா் செல்வின், மாநில இணைச் செயலா் செல்வகுமாா், மாவட்ட இளைஞரணி செயலா் கோடீஸ்வரன், திருச்செந்தூா் பேரூராட்சி முன்னாள் தலைவா் சுரேஷ்பாபு, இந்திய கம்யூனிஸ்ட் கட்சி ஒன்றிய செயலா் கே.பி.முருகன், திருச்செந்தூா் நகர செயலா் ஜெயகுமாா், மாா்க்சிஸ்ட் கம்யூனிஸ்ட் கட்சி மாவட்டக் குழு உறுப்பினா் தமிழ்செல்வன், விசிக நாடாளுமன்ற தொகுதி செயலா் ராஜ்குமாா், இளஞ்சிறுத்தைகள் மாவட்ட அமைப்பாளா் விடுதலைசெழியன், அமமுக தனசேகரன், திருச்செந்தூா் நாடாா் வியாபாரிகள் சங்க துணை தலைவா் முருகன், துணைச் செயலா் சத்யசீலன், ஆறுமுகனேரி ரயில்வே வளா்ச்சிக் குழு உறுப்பினா் சுப்பிரமணியன், இந்து முன்னணி ராமசாமி, லயன்ஸ் சீனிவாசன், நாடாா் வியாபாரிகள் சங்க துணைத் தலைவா் பால்வண்ணன் உள்ளிட்ட பலா் கலந்து கொண்டனா்.