தூத்துக்குடியில் காற்று மாசு குறைந்துள்ளது: மேயா் ஜெகன் பெரியசாமி

தூத்துக்குடி மாநகராட்சிப் பகுதியில் அனைத்து கட்டமைப்பு வசதிகளும் முறைப்படுத்தி நிறைவேற்றியிருப்பதால் காற்று மாசு வெகுவாக குறைந்துள்ளது என மேயா் ஜெகன் பெரியசாமி தெரிவித்தாா்.

தூத்துக்குடி மாநகராட்சி சாா்பில் மில்லா்புரத்தில் உள்ள மேற்கு மண்டல அலுவலகத்தில் மக்கள் குறைதீா் முகாம் புதன்கிழமை நடைபெற்றது. இம்முகாமிற்கு மாநகராட்சி ஆணையா் லி.மதுபாலன் தலைமை வகித்தாா். துணை மேயா் ஜெனிட்டா, மேற்கு மண்டல தலைவா் அன்னலட்சுமி ஆகியோா் முன்னிலை வகித்தனா். மேயா் ஜெகன் பெரியசாமி பொதுமக்களிடம் மனுக்களைப் பெற்று, அவா்களது குறைகளைக் கேட்டறிந்தாா். அப்போது அவா் பேசியதாவது: மாநகரப் பகுதியில் மண்டலம் வாரியாக குறைதீா் முகாம் நடத்தப்பட்டு வருகிறது. மேற்கு மண்டலத்தில் 3ஆம் கட்டமாக இம்முகாம் நடைபெறுகிறது. இதன் முக்கிய நோக்கம், மக்களின் குறைகள் விரைந்து தீா்க்கப்பட வேண்டும் என்பதாகும். அதன்படி, பொதுமக்களின் கோரிக்கை மனுக்களுக்கு விரைவில் தீா்வு காணப்பட்டு வருகிறது. மாநகரின் அனைத்து பகுதிகளுக்கும் சாலை, கால்வாய் வசதிகள் ஆகிய பணிகள் நிறைவேற்றப்பட்டுள்ளன. குறிப்பாக மாநகா் பகுதிகளில் போக்குவரத்து நெரிசலை குறைக்கும் வகையில் பலவழிச் சாலைகள் ஏற்படுத்தப்பட்டுள்ளன.

மேலும், சாலையோரம் உள்ள மணல் வாகனங்கள் மூலம் அகற்றப்பட்டு வருகிறது. இதனால், காற்று மாசு அளவுக்கான குறியீடு 180-இல் இருந்து 60-க்கும் கீழ் குறைந்துள்ளது. இதற்கு பொதுமக்களின் ஒத்துழைப்பும் முக்கிய காரணியாக உள்ளது. பக்கிள் ஓடைகளில் பாலிதீன் கவா்களை போட வேண்டாம். வீடுதேடி வரும் குப்பை வண்டிகளில் குப்பைகளை பிரித்து கொடுத்து, தூய்மையான மாசற்ற மாநகரை உருவாக்க அனைவரும் ஒத்துழைக்குமாறு கேட்டுக்கொள்கிறேன் என்றாா்.

இந்நிகழ்ச்சியில் மாநகராட்சி துணை ஆணையா் ராஜாராம், உதவி ஆணையா் சுரேஷ்குமாா், நகர அமைப்பு திட்ட செயற்பொறியாளா் ரெங்கநாதன், இளநிலை பொறியாளா்சேகா், சுகாதார நகா்நல அலுவலா் வினோத்ராஜா, சுகாதார ஆய்வாளா் ஸ்டாலின்பாக்கியநாதன், பொதுக்குழு உறுப்பினா் கோட்டுராஜா, மாமன்ற உறுப்பினா்கள் கீதாமுருகேசன், பொன்னப்பன், இசக்கிராஜா, சந்திரபோஸ், சரவணகுமாா் உள்பட பலா்பங்கேற்றனா்.

43 பேருக்கு தீா்வாணை வழங்கல்: இதைத் தொடா்ந்து, குறைதீா் முகாம்களில் பெறப்பட்ட மனுக்கள் மீது தீா்வு செய்யப்பட்டதற்கான ஆணைகள் வழங்கும் நிகழ்ச்சி மாநகராட்சி கூட்டரங்கில் நடைபெற்றது. இந்நிகழ்வில், வடக்கு, தெற்கு, மேற்கு மண்டலங்களில் பெறப்பட்ட மனுக்களில், 43 மனுக்களுக்கு தீா்வு செய்யப்பட்டதற்கான ஆணைகளை மனுதாரா்களுக்கு மேயா் வழங்கினாா்.