தூத்துக்குடி காமராஜ் கல்லூரியில் நாளை ‘உயா்வுக்குப் படி’ நிகழ்ச்சி

தூத்துக்குடி காமராஜ் கல்லூரியில் மாணவா்களின் உயா்கல்விக்கு வழிகாட்டும் ‘உயா்வுக்குப் படி’ என்ற நிகழ்ச்சி சனிக்கிழமை (செப். 21) நடைபெறும் என மாவட்ட ஆட்சியா் க.இளம்பகவத் தெரிவித்துள்ளாா்.

இது குறித்து அவா் வெளியிட்டுள்ள செய்திக்குறிப்பு:

தமிழ்நாடு திறன் மேம்பாட்டுக் கழகத்தால் ‘நான் முதல்வன்’ திட்டத்தின் கீழ் 2022-2023, 2024ஆம் கல்வி ஆண்டுகளில் 12-ஆம் வகுப்பு பயின்று பள்ளி இறுதி தோ்வு எழுதாதவா்கள், தோ்வு எழுதி தோ்ச்சி பெறாதவா்கள், தோ்வில் வெற்றி பெற்று உயா்கல்வி பெற கல்லூரிகளில் சேராதவா்கள் மற்றும் 8 ஆம் வகுப்பு முதல் பிளஸ் 2 வரையிலான கல்வியில் இடைநின்ற மாணவா்களுக்கான ‘உயா்வுக்குப் படி’ இரண்டாம்கட்ட வழிகாட்டல் நிகழ்ச்சி தூத்துக்குடி காமராஜ் கல்லூரியில் சனிக்கிழமை (செப். 21) காலை 9 மணிக்கு நடைபெறுகிறது.

கலை அறிவியல் கல்லூரிகள், பொறியியல் கல்லூரிகள், தொழில்நுட்பக் கல்லூரிகள், தொழிற்பயிற்சி நிலையங்கள் ஆகியவை கலந்து கொண்டு உயா்கல்வி தொடா்பான வழிகாட்டுதல்களையும், தங்கள் கல்வி நிலையங்களுக்கான மாணவா் சோ்க்கையையும் மேற்கொள்ள உள்ளனா். மேலும், நலத்திட்ட உதவிகள், கல்வி உதவித்தொகை, உறைவிட வசதி குறித்த விவரங்கள் தெரிவிக்கப்படும். கல்விக்கடன் தேவைப்படும் மாணவா்களுக்கு வங்கிக் கடன் வழங்க முன்னோடி வங்கி மேலாளா்கள் அனைத்து நடவடிக்கைகளையும் மேற்கொள்வா்.

இதில், பள்ளி கல்வியில் இடைநின்ற மாணவா்களுக்கு சான்றிதழுடன் கூடிய குறுகிய கால தொழிற்பயிற்சி, தொழில்முனைவோராக உருவாக்கும் திறன் மேம்பாட்டு பயிற்சி, குறுகிய கால திறன் மேம்பாட்டு பயிற்சி குறித்த ஆலோசனை மற்றும் வழிகாட்டுதல்களை திறன் மேம்பாட்டுத் துறை அலுவலா்கள் வழங்க உள்ளனா். எனவே, மாணவ-மாணவிகள் இந்த வாய்ப்பைப் பயன்படுத்திக்கொள்ள வேண்டும் எனத் தெரிவித்துள்ளாா்.