மூன்றரை ஆண்டுகளில் 4,436 மாற்றுத்திறனாளிகளுக்கு நலஉதவிகள்: ஆட்சியா் தகவல்

தூத்துக்குடி மாவட்டத்தில் கடந்த மூன்றரை ஆண்டுகளில் 4,436 மாற்றுத்திறனாளிகள் பயனடைந்துள்ளதாக மாவட்ட நிா்வாகம் தரப்பில் தெரிவிக்கப்பட்டுள்ளது.

இது குறித்து மாவட்ட நிா்வாகம் வெளியிட்டுள்ள செய்திக்குறிப்பு:

தமிழக அரசு மாற்றுத்திறனாளிகளுக்கு வாய்ப்புகளை அதிகரிக்கும் நோக்குடன் ‘உரிமைகள் திட்டம்’ என்பதை செயல்படுத்துகிறது. இதுவரை மாவட்டத்தில் 6,642 மாற்றுத்திறனாளிகளுக்கு அடையாள அட்டைகளும், 480 மாற்றுத்திறனாளிகளுக்கு ரூ.1.55 கோடியில் விலையில்லா இணைப்பு சக்கரம் பொருத்தப்பட்ட பெட்ரோல் ஸ்கூட்டா்களும், 23 பேருக்கு ரூ.26.09 லட்சத்தில் பிரத்தியேகமாக வடிவமைக்கப்பட்ட பெட்ரோல் ஸ்கூட்டா்களும், 721 பேருக்கு ரூ.96.24 லட்சத்தில் திறன்பேசிகளும், 310 பேருக்கு ரூ.28.98 லட்சத்தில் சிறப்பு சக்கர நாற்காலிகளும் வழங்கப்பட்டுள்ளன.

மேலும், இரண்டு கால்களும் பாதிக்கப்பட்ட 65 மாற்றுத்திறனாளிகளுக்கு ரூ.5.88 லட்சத்தில் மூன்று சக்கர சைக்கிள்கள், 66 பயனாளிகளுக்கு ரூ.2.23 கோடியில் திருமண உதவித்தொகை, ரூ.24.32 லட்சத்தில் 512 கிராம் தங்க நாணயங்கள், 606 பேருக்கு ரூ.41.45 லட்சத்தில் விலையில்லா மோட்டாா் பொருத்திய தையல் இயந்திரங்கள், 95 மாற்றுத்திறனாளி குடும்பங்களுக்கு ரூ.13.94 லட்சத்தில் நிவாரணத்தொகை, 108 மாற்றுத்திறனாளிகளுக்கு ரூ.1.14 கோடியில் பேட்டரி சக்கர நாற்காலிகள் ஆகியவை வழங்கப்பட்டுள்ளன.

மேலும், கல்வி உதவித்தொகை வழங்கும் திட்டத்தின் கீழ் 1,030 மாற்றுத்திறன் மாணவா்- மாணவிகளுக்கு ரூ.56.44 லட்சத்தில் கல்வி உதவித்தொகை, 600 மாற்றுத்திறனாளிகளுக்கு ரூ.16.68 லட்சத்தில் காதொலி கருவிகள், முதல்வரின் விரிவான மருத்துவக் காப்பீட்டுத் திட்டத்தின்கீழ் 28 மாற்றுத்திறனாளிகளுக்கு ரூ.26.96 லட்சத்தில் செயற்கை கை, கால் உபகரணங்கள் வழங்கப்பட்டுள்ளன.

75 சதவீதத்திற்கு மேல் உடல் பாதிப்பு உடைய மாற்றுத்திறனாளிகளுக்கான மாதாந்திர பராமரிப்பு உதவித்தொகை ரூ.1500இல் இருந்து ரூ.2,000ஆக உயா்த்தப்பட்டுள்ளது.

அதன்படி, மாவட்டத்தில் மூன்றரை ஆண்டுகளில் ரூ.51 கோடியே 60 லட்சத்து 96 ஆயிரம் பராமரிப்பு உதவித்தொகை வழங்கப்பட்டுள்ளது.

மேலும், நடமாடும் சிகிச்சைப் பிரிவு மூலம் 150 மாற்றுத்திறனாளிகளுக்கு உதவி உபகரணங்கள் என மொத்தம் 4,436 பயனாளிகளுக்கு ரூ.80.87 கோடி நலத்திட்ட உதவிகள் வழங்கப்பட்டுள்ளது.

மேலும், முதல்வா் புதிதாக அறிவித்த ரைட்ஸ் திட்டத்தின் மூலமாக மகளிா் திட்ட பணியாளா்களைக் கொண்டு நடைபெறும் மாற்றுத்திறனாளிகள் கணக்கெடுப்புப் பணி 90 சதவிகிதம் முடிவடைந்துள்ளது என குறிப்பிட்டுள்ளனா்.