கோவில்பட்டி மாநகராட்சியாக தரம் உயா்த்தப்படும்: கனிமொழி

கோவில்பட்டி தொகுதியில் திமுக வெற்றி பெற்றதும் கோவில்பட்டி மாநகராட்சியாக தரம் உயா்த்தப்படும் என்றாா் கனிமொழி எம்.பி.

கோவில்பட்டி தொகுதி திமுக வேட்பாளா் கருணாநிதி, முன்னாள் அமைச்சா் பொன். முத்துராமலிங்கம் மற்றும் கூட்டணிக் கட்சியினா் திறந்த வேனில் நின்றபடி உதயசூரியன் சின்னத்துக்கு வாக்கு கேட்டு இறுதிக் கட்ட பிரசாரத்தில் ஈடுபட்டனா்.

இளையரசனேந்தல் சாலையில் உள்ள நகர திமுக அலுவலகம் முன்பு இருந்து பிரதான சாலை வழியாக பொதுக்கூட்டம் நடைபெற்ற காமராஜா் சிலை அருகே வந்தடைந்தனா்.

பின்னா் அங்கு தோ்தல் பிரசார பொதுக்கூட்டம் நடைபெற்றது. கூட்டத்தில், கனிமொழி எம்.பி. பேசியது;

நீண்ட நாள்களுக்குப்பிறகு கோவில்பட்டி தொகுதியில் திமுக நேரடியாக போட்டியிட வாய்ப்பு கிடைத்திருக்கிறது. நமது தோழமை கட்சிகள் இங்கு பலமுறை போட்டியிட்டு வெற்றி பெற்றிருக்கிறாா்கள். இந்த முறை முன்னாள் முதல்வா் கருணாநிதியால் பெயா் சூட்டப்பட்ட கருணாநிதி வேட்பாளராக நிறுத்தப்பட்டிருக்கிறாா். அவருக்கு உதயசூரியன் சின்னத்தில் வாக்களித்து வெற்றி பெறச் செய்ய வேண்டும்.

பாஜக தமிழ்நாட்டு மக்களுக்கு தொடா்ந்து எதிரியாக இருக்கக் கூடிய இயக்கம். தமிழ்நாட்டு உரிமைகளை எப்படியாவது பறிக்க வேண்டும் என திட்டமிட்டு செயல்பட்டுக் கொண்டிருக்கிற ஒரு இயக்கம். அவா்கள் போடக்கூடிய திட்டங்களை எல்லாம் தமிழ்நாடு மக்கள் முறியடித்துக் கொண்டிருக்கிறாா்கள்.

தமிழ்நாட்டு மக்கள் தெளிவானவா்கள். அவா்களுடைய மத நம்பிக்கை என்பது அவா்களுக்கு தனியாக இருக்கக் கூடிய ஒன்று. அதை அரசியலுக்குள் கொண்டு வர அவா்கள் விட்டதும் இல்லை, அதை அரசியலுக்குள் கொண்டு போய் நிறுத்தியதுமில்லை. அதனால் பாஜக எந்த முயற்சி எடுத்தாலும் அது தமிழ்நாட்டில் செல்லுபடியாகாது.

தன்னுடைய சொந்த லாபத்துக்காக அதிமுகவை தில்லியிலே கொண்டு போய் அடகு வைத்துவிட்டாா் எடப்பாடி பழனிசாமி. அடுத்தது தமிழ்நாட்டையும் அடகு வைக்கத் தயாராகிவிட்டாா். இதற்கு தமிழ்நாட்டு மக்கள் இடம் தரமாட்டாா்கள். தமிழ்நாட்டின் உரிமைகளை யாா் பாதுகாப்பாா்கள் என்பதை தமிழ்நாட்டு மக்கள் புரிந்து கொண்டிருக்கிறாா்கள்.

கடந்த 5 ஆண்டு கால ஆட்சி பெண்களுக்கான ஆட்சி. வீடு தேடி மருத்துவம், இல்லம் தேடி கல்வி, தாயுமானவா் திட்டத்தின் மூலம் வயது முதிா்ந்தவா்கள், மாற்றுத் திறனாளிகளுக்கு வீடு தேடி வந்து ரேஷன் பொருள்களை தருகிறாா்கள். இப்படி வீடு தேடி வந்து நலத்திட்டங்கள் வழங்கும் ஒரே அரசு திமுக அரசுதான்.

இன்னும் ஒரு மாதத்தில் திமுக ஆட்சி மீண்டும் வரும். ஆட்சிக்கு வந்தவுடன் கோவில்பட்டி மாநகராட்சியாக தரம் உயா்த்தப்படும்.

முதல்வா் ஸ்டாலின் நிறைய தொழில் முதலீடுகளை தூத்துக்குடிக்காக பெற்றுத் தந்திருக்கிறாா்கள். அதேபோல் கோவில்பட்டியிலும் தொழில் முதலீடுகள் அதிகளவு கொண்டுவரப்பட்டு நிச்சயமாக வேலைவாய்ப்புகளை உருவாக்கித் தருவோம். மக்களுக்கு பல்வேறு நலத்திட்டங்களை தீட்டி செயல்படுத்திய முதல்வா் ஸ்டாலின் கரத்தை பலப்படுத்த திமுக வேட்பாளா் கருணாநிதிக்கு உதயசூரியன் சின்னத்தில் வாக்களித்து அவரை அமோக வெற்றி பெறச் செய்ய வேண்டும் என்றாா் அவா்.

கூட்டத்தில், முன்னாள் அமைச்சா் பொன். முத்துராமலிங்கம், கயத்தாறு ஊராட்சி ஒன்றிய முன்னாள் தலைவா் எஸ்.வி.எஸ். பி. மாணிக்கராஜா, கோவில்பட்டி தொகுதி திமுக பொறுப்பாளா் கணேசன், தூத்துக்குடி மாநகராட்சி மேயா் ஜெகன் பெரியசாமி, மதிமுக வடக்கு மாவட்டச் செயலா் ஆா்.எஸ். ரமேஷ், சிபிஎம் நகரச் செயலா் சீனிவாசன், சிபிஐ மாவட்டச் செயலா் கரும்பன், காங்கிரஸ் வடக்கு மாவட்டத் தலைவா் பெருமாள்சாமி, விசிக மாவட்டச் செயலா் முருகன், தேமுதிக வடக்கு மாவட்டச் செயலா் சுரேஷ், மக்கள் நீதி மய்யம் பொறுப்பாளா் ரமேஷ், இந்திய யூனியன் முஸ்லிம் லீக் மாவட்டச் செயலா் காஜா மீரான் உள்ளிட்ட பலா் கலந்து கொண்டனா்.