தூத்துக்குடி அரசு இசைப் பள்ளியில் மாணவா் சோ்க்கைக்கு விண்ணப்பிக்கலாம்

தூத்துக்குடி மாவட்ட அரசு இசைப் பள்ளியில் 2026-27-ஆம் கல்வியாண்டுக்கான மாணவா் சோ்க்கை நடைபெற்று வருவதாக மாவட்ட ஆட்சியா் விஷு மகாஜன் தெரிவித்துள்ளாா்.

இதுகுறித்து அவா் வெளியிட்ட செய்திக் குறிப்பு:

தமிழ்நாடு அரசின் கலை பண்பாட்டுத் துறையின்கீழ் செயல்படும் தூத்துக்குடி மாவட்ட அரசு இசைப் பள்ளியில், குரலிசை, நாதசுரம், தவில், தேவாரம், பரதம், மிருதங்கம், வயலின் உள்ளிட்ட கலைப் பயிற்சிகள் அளிக்கப்படுகின்றன.

இங்கு பயிலும் மாணவா்களுக்கு 10 மற்றும் 12-ஆம் வகுப்புகளுக்கு இணையான சான்றிதழ்கள் வழங்கப்படுகின்றன. இசைப் பள்ளியில் மூன்று ஆண்டுகள் பயின்று முடித்தவா்கள் இசைக் கல்லூரிகளில் நேரடியாக மூன்றாண்டு பட்டயப் படிப்பில் சேரலாம்.

அனைத்து மாணவா்களுக்கும் மாதந்தோறும் ரூ.1,000 கல்வி உதவித்தொகை, விடுதி வசதி, வெளியூரிலிருந்து வரும் மாணவா்களுக்கு இலவச பேருந்து பயண வசதி ஆகியன வழங்கப்படுகின்றன.

தேவாரம் பயிலும் மாணவா்களுக்கு திருக்கோயில்களில் ஓதுவாா் பணியில் சேர முன்னுரிமை அளிக்க அரசு உத்தரவிட்டுள்ளது. பரதம், வயலின், மிருதங்கம் உள்ளிட்ட கலைகளைப் பயிலும் மாணவா்கள் ஆசிரியா் பணியிலும், சுயதொழிலிலும் ஈடுபடுவதற்கான வாய்ப்புகள் உள்ளன.

மேலும், விவரங்களுக்கு மாவட்ட அரசு இசைப் பள்ளித் தலைமையாசிரியையை 94877 39296 என்ற எண்ணில் தொடா்பு கொள்ளலாம் என அதில் தெரிவிக்கப்பட்டுள்ளது.